Barcha uchun sevimli bo‘lgan Choco pie pechenyesini uyda tayyorlaymiz

Yumshoq biskvitdan tayyorlangan ushbu shirinlik do‘konlardagidan ko‘ra ancha mazali.

Kerakli mahsulotlar:

• tuxum – 1 dona;
• shakar – 80 gramm;
• sut – 130 ml;
• sariyog‘ – 60 gramm;
• un – 200 gramm;
• qabartma (razrixlitel) – ½ choy qoshiq.

• jelatin – 7 gramm;
• suv – 130 ml;
• shakar – 120 gramm;
• limon sharbati – 2 choy qoshiq.

• qora shokolad – 100 gramm;
• sariyog‘ – 1 choy qoshiq;
• sut – 1 osh qoshiq.

1. Avvalo pech 180 darajada qizitiladi. Tuxum va shakar ko‘pirguncha mikser qilinadi. Ko‘pirtirish jarayonida sut va biroz yumshatilgan sariyog‘ qo‘shiladi.
2. Un elakdan o‘tkazilib, qabartma bilan aralashtiriladi. So‘ngra sutli aralashma oz-ozdan quyilib, bir xil massali xamir tayyorlanadi.
3. Xamir qandolat qopchasi yordamida pishirish varag‘i yuzasiga bir xil aylana shaklida siqib chiqariladi.
4. Qizigan pechda biskvitlar 12 daqiqa mobaynida pishirib olinadi va sovitishga qo‘yiladi.
5. Jelatin 100 ml suvda 20-30 daqiqaga bo‘ktiriladi.
6. Shakar 30 ml suv bilan o‘rtacha olovga qo‘yiladi. Aralashma qaynab chiqqanidan so‘ng yana 5-6 daqiqadan keyin olovdan olinadi.
7. Jelatin mikroto‘lqinli pechda erigunga qadar 10-12 soniyaga qizdiriladi. So‘ngra kattaroq idishda yaxshilab mikser bilan aralashtiriladi. Shakarli qaynatma, limon sharbati qo‘shiladi. Sufle qattiq va oppoq bo‘lgunga qadar ko‘pirtirishda davom etiladi.
8. Biskvitlarning soniga qarab ularning yarmiga sufle joylashtirib chiqiladi. Qolgan yarmi esa ustiga yopiladi.
9. Hosil bo‘lgan ikki qavatli biskvitlar 20 daqiqaga muzlatkichga qo‘yiladi.
10. Shokolad mayda bo‘laklarga bo‘linib, sut va sariyog‘ bilan aralashtiriladi. Suv hammomida eritiladi.
11. Muzlatilgan biskvitlar shokoladli glazurga botirib olinadi, so‘ngra idishga joylashtirilib, 1-2 soat davomida muzlatkichga qo‘yiladi.