Rossiya Tashqi ishlar vazirligi mamlakatdagi barcha xorijiy davlat elchixonalariga xodimlarini “Sputnik V” vaksinasi bilan bepul emlash taklifi bildirilgan nota yubordi. Bu haqda Meduza xabar berdi.
Bu taklif Rossiyada faoliyat olib borayotgan 12 ming diplomat va ularning oilalari uchun yuborilgan.
“Diplomatik korpusni koronavirusga qarshi vaksinatsiyaga taklif qilish tajribasi ko‘p davlatlarda keng tarqalgan”, — deya ma’lumot berdi TIV. Tashkilotning qo‘shimcha qilishicha, Rossiya xalqaro shartnomalarga asosan o‘z majburiyatini bajaryapti.
Chet el elchixonalari Rossiya Tashqi ishlar vazirligining taklifiga turlicha javob qaytardi. MDH, Osiyo, Afrika va Lotin Amerikasidagi “Sputnik V” vaksinasi ma’qullangan davlatlar diplomatlari bu taklifni qabul qildi.
AQShning Moskvadagi elchisi Jon Sallivanning ta’kidlashicha, u vaksinani olmaydi, chunki “Rossiya aholisi uchun mo‘ljallangan ‘Sputnik V’ vaksinasi bilan emlanishni istamaydi”. Shuningdek, The Washington Post nashrining xabar berishicha, Amerika elchixonasining boshqa xodimlari Rossiya vaksinasi bilan emlanishini so‘rab murojaat qilgan, chunki ular yaqin orada Amerikaning Moderna va Pfizer kompaniyalari vaksinasi bilan emlanishiga shubha bildirmoqda.
Yevropa Ittifoqi davlatlari elchixonalarining vakillari ta’kidlashicha, Yevropa Dori-darmon agentligi (EMA) “Sputnik V” vaksinasini ma’qullamagunicha, ularga bu vaksinadan foydalanmaslikni tavsiya qilmoqda.
“RIA Novosti” ma’lumotlariga ko‘ra, Rossiyada Mo‘g‘uliston, Ispaniya, Belarus va Afg‘oniston elchixonalari xodimlari “Sputnik V” vaksinasi bilan emlandi, shuningdek, Kubaning Moskvadagi elchisi ham bu vaksina bilan emlanishni rejalashtiryapti.
Izoh (0)