Eldor Shomurodov Italiyada qanday uyda yashayotganligini ko‘rsatdi (video)

O‘zbekiston terma jamoasi va “Jenoa” hujumchisi Eldor Shomurodov Genuyada (Italiya) qanday uyda yashayotganligini ko‘rsatdi.

Rossiyalik jurnalist Nobel Arustamyan bilan bo‘lgan suhbatda 25 yoshli futboli o‘zi istiqomat qilayotgan uyni ko‘rsatdi va undagi qulayliklar bilan o‘rtoqlashdi. Ko‘p qavatli imoratning ikkinchi qavatida joylashgan xonadondan mehmonxona, oshxona, yotoqxona va boshqa xonalar o‘rin olgan.

Eldorning so‘zlariga ko‘ra, u ushbu uyga “Jenoa”ga qo‘shilganidan 15 kun o‘tgach ko‘chib o‘tgan. Shomurodovgacha ushbu xonadonda Antonio Sanabriya istiqomat qilgan. Hozirda “Betis” (Ispaniya) sharafini himoya qilayotgan paragvaylik futbolchi 2019—2020-yillarda “Jenoa” safida to‘p surgan.

Ma’lumot uchun, Shomurodov 2020-yilgi yozgi transfer oynasida “Rostov”dan genuyaliklar safiga yo‘l oldi. Eldor “Jenoa” safida 16 ta o‘yin o‘tkazib, 2 ta gol va 2 ta golli uzatma muallifiga aylandi.