Yangi Zelandiyaning Oklend shahrida olti oy ichida birinchi marta COVID-19’ga chalinish bo‘yicha uchta holat aniqlangani uchun karantin joriy qilindi. Bu haqda mamlakat bosh vaziri Jasinda Ardernga tayanib “Korrespondent.net” xabar berdi.
“Men Yangi Zelandiya xalqidan keyinchalik ham kuchli va irodali bo‘lishini so‘rayman. Bilaman, bu sodir bo‘lganda biz o‘zimizni yolg‘iz his qilamiz. Barchamizda ‘yana takrorlanmasin’ degan xavotir bor. Lekin unutmang, buni avval ham yengib o‘tganmiz, bu safar ham ushbu sinovlardan faqat birgalikda o‘tishimiz mumkinligini yaxshi bilamiz”, — deya ta’kidladi Ardern.
Yangi Zelandiya so‘nggi olti oy ichida birinchi marta karantin joriy etdi. Avvalroq mamlakat epidemiyaga qarshi kurashning muvaffaqiyat namunasi edi, chunki u koronavirus tarqalishini to‘xtata oldi. Mamlakatda katta konsertlar va ommaviy sport tadbirlari qayta tiklandi, shuningdek, majburiy xavfsizlik talablari olib tashlandi.
Endilikda Oklend shahrida 14-fevral, yakshanba kuni tundan boshlab karantin joriy qilindi. Mamlakatning boshqa hududlarida xavfsizlik choralari kuchaytiriladi, lekin hozircha qat’iy karantin joriy qilinmaydi.
Ma’lumot uchun, dunyoda koronavirusga chalinganlar soni 109 milliondan oshdi va 2,4 million kishi virus qurboniga aylandi.
Mavzuga doir:
- Yangi Zelandiyada ikki oy ichida birinchi marta koronavirusga chalinish holati aniqlandi
- Avstraliyada koronavirus qurbonlari soni bo‘yicha kunlik antirekord o‘rnatildi. Yangi Zelandiyada COVID-19 sababli parlament saylovi kechiktirildi
- Yangi Zelandiyadagi parlament saylovlarida mamlakat bosh vaziri Jasinda Ardern partiyasi g‘olib bo‘ldi
Izoh (0)