“Rospotrebnadzor” (Rossiya Iste’molchilar huquqlari va inson farovonligi sohasidagi nazorat bo‘yicha federal xizmat) olimlari koronavirusning “britancha” shtammini aniqlaydigan dunyodagi birinchi test tizimini ishlab chiqdi va ro‘yxatdan o‘tkazdi, deb xabar beradi “RBK” muassasa bayonotiga tayanib.
Uni ishlab chiqish bilan “Rospotrebnadzor”ning epidemiologiya bo‘yicha markaziy ilmiy tadqiqot instituti shug‘ullandi.
“Yangi test tizimi aynan mutatsiyaga uchragan shtammning bor-yo‘qligini tezkor aniqlaydi, bunga ‘britancha’ mutatsiyani samarali amplifikatsiya qilish uchun oligonukleotidlarni alohida saylab olish orqali erishilgan va virusning 106 nusxa/ml darajasidagi maksimal zichligiga moslashtirilgan. Bu virus yuklamasi juda katta bo‘lgan namunalar uchun mutatsiyani aniqlashda soxta musbat natijalar kelib chiqishidan saqlaydi”, — deya “Rospotrebnadzor” aniqlik kiritgan.
Reagentlar to‘plami klinik tadqiqotlardan muvaffaqiyatli o‘tgan va yuqori aniqlikka ega. Buni mutatsiyaga uchragani tasdiqlangan virusning klinik namunalarida o‘tkazilgan sinovlar isbotladi.
Ushbu texnologiyalar asosida koronavirusning boshqa har qanday mutatsiyalarini, shuningdek, tezkor ommaviy testdan o‘tkazish talab qilinadigan boshqa yuqumli qo‘zg‘atuvchilarni aniqlash uchun ham test tizimlarini yaratish mumkin.
Dekabr oyi o‘rtalarida Buyuk Britaniyada koronavirusning yangi mutatsiyasi aniqlangandi. Ko‘pgina mamlakatlar, shu jumladan, Rossiya Buyuk Britaniyaga parvozlarni vaqtincha to‘xtatdi. Rossiyalik virusolog yangi variantning tez tarqalayotgani sababli u asta-sekin eski shtamm o‘rnini bosishini aytgan. Yanvar oxirlariga kelib, koronavirusning yangi shtammi 60 ga yaqin mamlakatda qayd etilgan edi.
Izoh (0)