“Havas” oilaviy guruhi nafaqat O‘zbekistonda, balki dunyo bo‘ylab, jumladan, Yevropa va Osiyoda mashhurlikka erishmoqda. Guruh a’zolari yosh bo‘lishiga qaramay, o‘z iqtidori tufayli bir qancha sovrinlarga erishishga muvaffaq bo‘lgan.
Guruhning yetakchi solisti, “Nihol” mukofoti sovrindori Qahramon G‘ulomjonov pianino chaladi. U bir qancha xalqaro tanlovlar g‘olibi. Guruhning yana bir a’zosi Shahnoza G‘ulomjonova “Zulfiyaxonim qizlari” tanlovi laureati. Fransiya va boshqa mamlakatlarda o‘tkazilgan tanlovlar g‘olibi — Dostonbek skripkachi, musiqiy guruhning eng kichik a’zosi Robiya esa vokal va skripka chalishga qiziqadi. U 6 yoshidayoq Britaniya, Serbiya, Italiya, Avstriyadagi musiqa tanlovlarida g‘olib chiqqan.
“Havas” guruhi bir qancha tillardagi qo‘shiqlarni qoyilmaqom tarzda kuylashiga qaramay, ularning repertuaridan ko‘proq hind taronalari o‘rin olgan. Shuningdek, ular bilan Nyu-Dehli, Mumbay, Agra, Bopal, Koimbator va Panjobda konsert dasturlari va ijodiy uchrashuvlar bo‘lib o‘tgan.
Mumbayda 2016-yilda bo‘lib o‘tgan “Dil Hai Hindustani” xalqaro musiqa tanlovida g‘olib bo‘lganlar orasida mazkur guruh ham bo‘lib, ular oltin disk bilan taqdirlangan. Ushbu xalqaro musiqa tanlovida dunyoning 63 mamlakatidan ishtirokchilar qatnashgan.
Guruh hind xalqining ozodligi va mustaqilligi uchun kurashgan taniqli davlat va jamoat arbobi Mahatma Gandi tavalludining 150 yillik yubileyi munosabati bilan Dehli shahrida 2019-yilda o‘tkazilgan tadbirda ishtirok etib, 47 ta davlatdan tashrif buyurgan san’atkorlar orasida Mahatma Gandining sevimli “Vaishnava Jana To” qo‘shig‘ini kuylagan. Uning mazkur ijrosi hindistonliklar va xalqaro hamjamiyat tomonidan yuqori baholangan hamda unga yanvar oyining ilk kunlarida Hindiston tashqi ishlar vaziri Sushma Svarajning tashakkurnomasi topshirilgan.
Professionallikni yuqori baholaydigan hind tomoshabinlari oilaviy tarzda ijod qilayotgan musiqiy guruhning muxlisiga aylangan. Endilikda oilaviy guruh Bollivudning marhum aktyori Sushant Singx Rajput xotirasiga bag‘ishlab, “Bechora yurak” taronasi hamda videoklipini taqdim etdi. Ijroga munosabat turlicha bo‘lishi tabiiy, chunki muxlislar har doim ham asl taronani qadrlaydi. Ammo ushbu guruh esa buni har tomonlama uddalashga harakat qildi. Buning uchun marhum aktyorning muxlislari “Havas” guruhidan minnatdor bo‘lishi shubhasiz.
Izoh (0)