O‘zbekiston Favqulodda vaziyatlar vazirligi 11-fevral kuni Telegram’da ushlangan boshpanasiz itlar otib tashlanishi to‘g‘risidagi xabarlarga izoh berdi.
“FVV, itlarni ushlash bo‘yicha har yilgi musobaqasini o‘tkazayotgan ko‘rinadi. ‘Zo‘r-a?’. Joriy yilda ‘Hayot’ (boshpanasiz hayvonlar muruvvat uyi — tahr.) itlar ushlanganidan so‘ng, reabilitatsiya va axtalashga olib ketilishi bo‘yicha kelishib oldi. Volontyorlar Bo‘kaga kelib, ‘jasur’ it tutuvchilar bechora ko‘ppaklarni ushlab, kaltaklanganiga, kichik xonaga 200 tasi qamab qo‘yilganiga guvoh bo‘ldi va ularning barchasini otib tashlash rejalashtirilgan”, — deyiladi postda.
FVVning ma’lum qilishicha, vaziyat yaxshilab o‘rganilgan bo‘lib, muallifning ayblovi “asossiz va haqiqatga mos kelmaydi”.
“Bugun asosiy manbasi itlar bo‘lgan quturish tarqalishining oldini olishga yo‘naltirilgan profilaktika tadbiri doirasida boshpanasiz to‘rt oyoqli jonzotlar ushlandi”, — deyiladi FVV matbuot xizmati xabarida. Tadbir IIV, Sog‘liqni saqlash vazirligi, Veterinariya va chorvachilikni rivojlantirish boshqarmasi va Bo‘ka tuman hokimligi tomonidan o‘tkazilgan.
“Muallif boshpanasiz itlar otib tashlanishini taxmin qildi. Ushbu taxmin ham haqiqatga mos kelmaydi. Aksincha. Boshpanasiz itlar veterinariya tekshiruvi uchun ushlangan. To‘rt oyoqli jonzotlar 5 sutka davomida Obodonchilik boshqarmasida ushlab turiladi, bu vaqt davomida itlarning egasi topilmasa, ular parvarishlanadigan maxsus joyga yuboriladi”, — deyiladi xabarda.
Ta’kidlashicha, qo‘lga olingan hayvonlarni xususiy parvarishlar maskanlariga topshirilishi odatda hayvon himoyachilari va ularni ushlovchi brigadalar o‘rtasidagi kelishuvga bog‘liq. Vazirlar Mahkamasining 2011-yil 8-iyuldagi 202-sonli qarori bilan qarovsiz hayvonlarni tutish va parvarish qilish, qo‘lga olingan hayvonlar uchun davlat boshpanalarini yaratish va ta’minlash xizmatlari faoliyati tartibga solingan.
Avvalroq Toshkent viloyatida o‘quvchi boshpanasiz itlarning otilishiga qarshi chiqqan faolning boshini g‘isht bilan urib yorgani to‘g‘risida xabar berilgandi.
Izoh (0)