Tanzaniyada bir necha oydan beri rasmiy ravishda koronavirus qayd etilmayapti. Hukumat rahbarlari emlanishdan bosh tortib, COVID profilaktikasi sifatida an’anaviy tibbiyotdan foydalanishni taklif qilmoqda. Biroq shifoxonalar pnevmoniya bilan kasallangan bemorlarga to‘la, deb xabar berdi Meduza.
Foto: AFP
58 million aholi istiqomat qiladigan Tanzaniya davlatida 2020-yil bahorida 509 nafar kishida koronavirus kasalligi qayd etilgan, 21 kishi kasallikdan vafot etgan. Biroq 2020-yil iyun oyining boshlarida Prezident Jon Magufuli mamlakatda kasallik chekinganini va Tanzaniya yana sayyohlarni qabul qilishga tayyorligini rasman e’lon qilgan. Koronavirusga qarshi profilaktika sifatida u dorivor o‘tlar, bug‘ muolajalari, zanjabil va piyoz aralashmasidan foydalanishni taklif qilgan.
O‘shandan beri mamlakatda koronavirus bilan kasallanish statistikasi yuritilmayapti. Ammo, taxminan, 2020-yil dekabridan boshlab Tanzaniyada pnevmoniya simptomlari aniqlangan holatlar soni keskin o‘sa boshladi. Mamlakat prezidenti o‘zi, sog‘liqni saqlash vaziri va bir nechta rasmiylardan boshqa biror kimning koronavirusga oid masalalarni jamoatga izohlashini taqiqlagan. Shunga qaramay, katolik cherkovi virusning keng yoyilayotgani haqida ma’lum qilgan va cherkov ishchilarini niqob taqishga da’vat etgan.
Kasallik ortishi haqidagi xabarlar fonida Magufuli mamlakat fuqarolarini virusni qo‘shni davlatlardan yuqtirib kelganlikda aybladi. Shuningdek, bir nechta shifoxonalarga tashrif buyurgan mahalliy Sog‘liqni saqlash vazirligi rasmiylari pnevmoniya bilan kasallanish holatlarining aksariyati koronavirus bilan bog‘liq emasligini aytgan. Ular mamlakat aholisini niqob taqishga chaqirdi, ammo bu “koronavirus tufayli emas, balki nafas olish yo‘llari kasalliklarining oldini olish uchunligini” ta’kidladi.
Yanvar oyi oxirida Magufuli tanzaniyaliklardan “tajriba quyonchasi sifatida foydalanilishini” istamagani uchun aholining emlanmasligini e’lon qildi. U vaksinalarni xavfli deb atadi va ularning ish berishiga shubha bilan qaradi: “Agar oq tanlilar foydali vaksina yaratishga qodir bo‘lganda edi, ular OITS, saraton va silga qarshi vaksinalarni ham topgan bo‘lardi”.
Magufulining munosabati JSST tomonidan tanqid qilindi, biroq bir necha kundan keyin mamlakat sog‘liqni saqlash vaziri Doroti Gvajima vaksinalardan voz kechish majburiyatini yana bir bor tasdiqladi. Vazir hukumatning “dori-darmon olish bo‘yicha o‘z tartib-qoidalari” borligini aytib, shuningdek, tanzaniyaliklarni shaxsiy gigiyenaga amal qilish, qo‘llarni yuvish va dezinfeksiyalovchi vositalardan foydalanishga chaqirdi.
Axios nashrining yozishicha, Tanzaniya o‘z hududida koronavirus mavjudligini inkor qilayotgan dunyodagi yagona davlat emas. Shu bilan birga, boshqa shu singari mamlakatlar, masalan, KXDR va Turkmaniston o‘z aholisini ommaviy emlashni rejalashtirmoqda. Nashrning yozishicha, chegaralari ochiq sharoitda Tanzaniya hukumatining xatti-harakatlari butun dunyoga xavf tug‘dirishi mumkin, chunki u yerdan virusning yangi turlari tarqalishi mumkin. Yanvar oyi oxirida Daniyada Tanzaniyadan qaytgan ikki kishiga koronavirusning “afrikacha” shtammi tashxisi qo‘yilgandi, mavjud vaksinalarning ushbu shtammga ta’siri yomonroq bo‘lishi mumkin.
Bir qator davlatlar allaqachon Tanzaniya bilan havo qatnovlarini cheklab qo‘ygan. Masalan, Tanzaniyaning sobiq metropoliyasi (mustamlakachi mamlakat) — Buyuk Britaniya hukumati bu mamlakatdan keluvchilarni o‘z hududiga kirishini taqiqladi, AQSh hukumati esa koronavirus tufayli u yerga tashrif buyurishni rasman tavsiya qilmagan.
Rossiyada Tanzaniya bilan bog‘liq cheklovlar o‘rnatilmagan. Tanzaniyadan qaytib kelgan rossiyaliklar uch kun ichida koronavirusga test topshirishi kerak. So‘nggi ikki kun ichida ushbu test natijalari ijobiy chiqqan ikkita holat Xakasiya va Tula viloyatiga kelgan sayyohlarda aniqlandi.
