2021-yil 9-fevral kuni nafaqat O‘zbekiston, balki Markaziy Osiyodagi yirik va zamonaviy zargarlik buyumlari ishlab chiqariladigan Fonon zavodida, “Asakabank” AJ tomonidan ommaviy axborot vositalari vakillari uchun press-tur tashkil etildi. Press-turda zavodning faoliyati bilan yaqindan tanishildi.
Gold Moon Tashkent MChJ tomonidan yaratilgan Fonon brendi o‘z faoliyatini 2020-yilda boshlagan va “Asakabank”ning yirik moliyaviy loyihasi hisoblanadi. Ushbu brend ostida noyob zargarlik san’at asarlari yetakchi italyan texnologiyalari asosida ishlab chiqariladi.
Loyihaning umumiy qiymati 28 million yevroni tashkil etadi, shundan “Asakabank”ning kredit mablag‘lari 19 million yevro, 9 million yevro esa korxonaning o‘z mablag‘lari evaziga tashkil etilgan.
Korxonada o‘rnatilgan uskunalar asosan Italiya, Germaniya va Turkiyadan keltirilgan. Ayni paytda 260 dan ortiq yangi ish o‘rinlari yaratildi, loyihaning to‘liq quvvat bilan ishga tushishi natijasida ish o‘rinlari soni 400 nafarga yetkaziladi.
Press-tur davomida jurnalistlar qimmatbaho metallardan zargarlik buyumlarini ishlab chiqarishning barcha asosiy bosqichlarida bevosita ishtirok etish, shuningdek, zargarlik buyumlari bo‘yicha yetakchi mutaxassislarga savollar berish imkoniyatiga ega bo‘ldilar.
Ishtirokchilar oltin quymalarni qayta ishlash bosqichlari va tayyor mahsulot yaratilish jarayonlari, oltin sifatini nazorat qilish usullari, xususan, zargarlik buyumlarining tarkibiy qismlarini aniqlashga imkon beradigan ekspress usul bilan ham tanishish imkoniyatiga ega bo‘ldilar.
Zargarlik buyumlarining barchasi faqatgina O‘zbekistonda qazib olingan oltindan tayyorlanadi. Zavodda 300 turdagi tayyor mahsulotlar va yarim tayyor mahsulotlar ishlab chiqarilmoqda. Korxonaning yillik ishlab chiqarish quvvati 6000,0 kilogramm zargarlik buyumlarini tashkil etadi.
Ma’lumot uchun
Bugungi kunda O‘zbekiston oltin ishlab chiqaruvchi va eksport qiluvchi yetakchi davlatlar qatoriga kiradi. O‘zbekiston oltin zaxiralari bo‘yicha dunyoda 4-o‘rinni, oltin qazib olish bo‘yicha 7-o‘rinni egallab turibdi. Ta’kidlash joizki, ushbu ko‘rsatkichlar mamlakat zargarlik sanoatini yangi bosqichga ko‘tarishga yordam beradi.
Call-centre: 1152
Sayt: asakabank.uzFacebook: fb.com/bankasakaTelegram: t.me/bank_asakaInstagram: instagram.com/asaka_bank
Reklama huquqi asosida.
Izoh (0)