AQShda ilk bor kongressmen COVID-19 asoratlari oqibatida vafot etdi

AQShda respublikachilar vakili bo‘lgan kongressmen Ron Rayt koronavirus infeksiyasini yuqtirib olganidan keyin vafot etdi. U COVID-19 qurboniga aylangan AQSh kongressining eng birinchi a’zosi hisoblanadi, deb yozmoqda The Hill.

“Kongressmen Ron Rayt 2021-yil 7-fevral kuni 67 yoshida vafot etdi”, — deyilgan AQSh kongressining xabarnomasida.

Rayt 21-yanvarda koronavirusga topshirgan tahlili “musbat” natija ko‘rsatganidan ikki hafta o‘tgach hayotdan ko‘z yumgan. Unda koronavirus aniqlangan vaqtda kongressmen kasallikning belgilari sezilar-sezilmas darajada ekanligi va o‘zini yaxshi his etayotgani, uydan turib, masofadan ishlashga tayyorligi haqida gapirgandi.

Nashrning qayd etishicha, 2020-yil sentabr oyida Rayt saraton muolajasidan keyingi asoratlar tufayli kasalxonada ma’lum vaqt davolangan.

Rayt AQSh vakillar palatasining xorijiy ishlar hamda mehnat va ta’lim qo‘mitalari a’zosi bo‘lgan.

Eslatib o‘tamiz, butun dunyoda COVID-19 bilan kasallanganlar soni 106 million nafardan oshib ketgan. Eng ko‘p kasallanish va infeksiya asoratlari oqibatida o‘lim bilan yakunlangan holatlar qayd etilgan mamlakat AQSh bo‘lib turibdi.

Yanvar oxirida AQSh Kongressi Vakillar palatasi a’zosi Stiven Linch (Massachusets shtatidan demokrat), belgilanganidek, vaksinaning ikkita dozasini olib bo‘lganidan keyin koronavirusga chalingandi. Shuningdek, AQShda koronavirus tarqalishi sekinlashgani, keyinroq esa COVID-19’ni tezkor aniqlash testini yaratgan amerikalik immunologning vafot etgani haqida xabar berilgan.