O‘zbekiston milliy terma jamoasi murabbiylar shtabiga 2 nafar chet ellik mutaxassis jalb qilindi. Ulardan biri Ektor Kuperning sobiq yordamchisi

Futbol bo‘yicha O‘zbekiston terma jamoasi murabbiylar shtabida o‘zgarish yuz berdi. Bu haqida O‘FA matbuot xizmati xabar qildi.

Vadim Abramov boshchiligidagi murabbiylar shtabida Antonio Sarioglou endilikda terma jamoaning jismoniy tayyorgarligiga javob beradi.

Gretsiyalik mutaxassis 2018-2019-yillarda O‘zbekiston terma jamoasida Ektor Kuperga yordamlashgan. Bunga qadar u Misr terma jamoasi, shuningdek, Gretsiyaning “Aris”, “Veriya” va “Iraklis” klublarida faoliyat yuritgan.

Terma jamoa bosh murabbiyi yordamchisi Temur Kapadze o‘rniga Viktor Tishenko tayinlandi. 71 yoshli rossiyalik mutaxassis o‘z vaqtida “Aqtobe”, “Neftchi”, “Lada-Tolyatti”, “Chernomorets” va “Sochi-04” klublarida ish olib borgan.

Eslatib o‘tamiz, O‘zbekiston terma jamoasi 7-fevral kuni BAA yig‘iniga jo‘nab ketdi.