Samarqandda COVID-19 bemorlarini davolash uchun moslashtirilgan so‘nggi markaz yopildi

Samarqandda koronavirus bilan kasallangan oxirgi bemor 5-fevral kuni sog‘ayib chiqqani sababli mazkur kasallikka chalingan bemorlarni davolash uchun moslashtirilgan so‘nggi markaz o‘z ishini yakunladi. Bu haqda viloyat Sog‘liqni saqlash boshqarmasi matbuot xizmati xabar berdi.

“Pandemiya boshlanganidan hozirga qadar ilk bor viloyatimizda koronavirusga chalinganlar butunlay sog‘aydi. Viloyat sog‘liqni saqlash boshqarmasi mazkur jarayonlarda fidoyilik ko‘rsatgan barcha tibbiyot xodimlariga o‘z minnatdorchiligini bildiradi”, — deyiladi xabarda.

Shuningdek, agar koronavirusga chalinish bo‘yicha yangi holatlari aniqlansa, Samarqandda viloyat yuqumli kasalliklar shifoxonasida alohida bo‘lib tayyorlab qo‘yilgani bildirilgan.

2020-yilning noyabrida Samarqandning Kattaqo‘rg‘on shahri va Urgut tumanidagi COVID markazlari yopilgani haqida xabar berilgan edi. O‘zbekistonda koronavirus bo‘yicha savollarga javob beradigan Call-markaz faoliyati ham vaqtinchalik to‘xtatilgan.