Andijonda tez yordam xodimlari COVID-19’ga qarshi kurashganlarga rag‘bat puli to‘lanmayotganidan shikoyat qildi. OAV aralashuvi bilan pullar qisman to‘lab berildi

Andijon viloyatining Marhamat tumanida tez tibbiy yordam bo‘limi shifokorlari koronavirus pandemiyasi davrida kasallikka qarshi kurashgan shifokorlarga rag‘bat puli to‘lanmayotganidan shikoyat qildi.

“Daryo” muxbiri Marhamat tumanida bo‘lib, tuman tez tibbiy yordam bo‘limining rag‘batlantirish to‘lovlari to‘lanmayotganidan norozi vakillari hamda tibbiyot birlashmasi mutasaddilari bilan shu masalada suhbatlashdi.

Qayd etilishicha, Vazirlar Mahkamasining 2020-yil 20-iyuldagi “Koronavirus infeksiyasiga qarshi kurash davrida aholini tez tibbiy yordam xizmati bilan keng qamrab olish chora-tadbirlari to‘g‘risida”gi 446-sonli va 2020-yilning 24-sentabr kuni qabul qilingan “O‘zbekiston Respublikasida koronavirus infeksiyasi tarqalishining oldini olish tadbirlariga ajratilayotgan mablag‘larning samaradorligini ta’minlashga oid qo‘shimcha chora-tadbirlar to‘g‘risida”gi 583-sonli qarorlarida har oy yakuniga qadar barcha tez tibbiy yordam brigadalarida ishlovchi xodimlarning lavozim maoshiga qo‘shimcha moddiy rag‘batlantirish to‘lovlarini amalga oshirish nazarda tutilgan.

“Hech qachon ishdan qochmaganmiz. Karantinning eng og‘ir kunlarida ham navbatchilikda turdik. Kasallik yuqishini bilsak-da, burchimiz deb chaqiruvlarga bordik, qochmadik. Bularni minnat qilmaymiz, qasamyodimiz bor. Ammo shuncha mehnat qilsang-u, Prezidentimiz berayotgan rag‘bat puli o‘z nafsini o‘ylab yashayotgan amaldorlar tufayli sengacha yetib kelmasa, qadr-qimmatingga achinasan ekan. Ishonasizmi, o‘zimga kasallik yuqqani to‘g‘risidagi tashxisni navbatchilikda turgan paytimda olganman. Ishlay desam, qolganlarni ham o‘ylab o‘sha kuni ishni tashlab ketishga majbur bo‘lganman. Allohga shukur, tuzalib yana ishga qaytdim. Afsuslanarlisi, dori-darmonlar ham ajratilmadi. Dorilarning o‘ziga bular bergan puldan ikki-uch barobar ko‘p mablag‘ sarflandi. Yaxshiyam bizda yengil o‘tdi. Og‘ir o‘tganda nima bo‘lardi? Vaholanki, virusni ish vaqtida yuqtirganman. Agar davolanish o‘rniga navbatchilikda turganimda bundan ko‘proq pul olardim. Axir kasalligim bois belgilangan navbatchilik kunlarimni o‘tkazib yuborishga majbur bo‘ldim”, — deydi Marhamat tuman tez tibbiy yordam bo‘limi feldsheri Muzaffar Normatov.

Muzaffar Normatov rag‘bat pulini olish uchun mas’ul rahbarlarga qayta-qayta murojaat qilganini, biroq natijasiz qolayotganini bildirmoqda.

“Biz rahbarlardan imkoniyati yo‘q narsalarni so‘ramayapmiz. Aksincha, mehnat qilganimiz uchun Prezident ajratgan qo‘shimcha rag‘batlantirish pullarini so‘rayapmiz, birovning cho‘ntagidagini emas. Ortiqcha biror so‘mga ehtiyojimiz ham yo‘q. Beriladigan pullar davolanishimizga ketgan mablag‘larimizning o‘rnini qoplaydi, xolos. Rahbarlarga aytsak, hech kimga berilmadi, deb aldashyapti. Kecha Asaka tumani tez yordamida ishlaydigan do‘stim bilan telefon orqali gaplashdim. Ularga 2020-yil 31-dekabr kuni rag‘batlantirish pullari berilibdi. Nega qo‘shni tumanlarga pul bor-u, Marhamat tumaniga kelganda ajratilmaydi. Shularni aytib, haqqimizni talab qilsak, ‘kattalar’ yo‘q narsaga yugurmasdan, ertaga shu yerda ishlashlaringni o‘yla, deb do‘q-po‘pisa qilyapti. Turli bosimlarga uchrayotgan hamkasblarimiz ham bor. Nima endi, ularning gapi bilan qilgan mehnatlarimiz, Prezident bergan pullarni olmaylikmi?”,— Muzaffar Normatov.

Bo‘lim feldsheri Abdurahim Ahmedovning aytishicha, shifokorlarga beriladigan bir martalik kiyimlar ham o‘z vaqtida yetkazib berilmagan. Shu sababli xodimlar himoya kiyimlarini har chaqiruvda dezinfeksiya qilib, yirtilib ketgunga qadar 10-15 martadan kiygan.

“Ishonasizmi, bir martalik kiyimlarni ham bir necha kunlab kiyib ishlagan paytlarimiz bo‘ldi. Shaxsan o‘zim, bir kiyimni 15-20 marotaba kiydim Almashtirish uchun ta’minotchilardan so‘rasak, ‘yetmayapti, dezinfeksiya qilib kiyib turing’, deyishdi. Aslida bunday qilish mumkinmas bo‘lsa-da, har chaqiruvga borganimizda dezinfeksiya qilib yurishga majbur bo‘ldik. Mana shuning natijasida ham ko‘pimizga kasallik yuqqan”,— deydi Abdurahim Ahmedov.

Tez yordam hamshirasi Sevara Yusufbekovaning aytishicha, ular koronavirus bilan kasallangan bemorlar xonadonida bo‘lib, ularni tibbiy ko‘rikdan o‘tkazgan. Ahvoli og‘ir bemorlarni tuman va viloyat markazidagi shifoxonalarga o‘tkazishda ham ishtirok etgan.

“Istaymizmi, yo‘qmi tez tibbiy yordam bo‘limlari xodimlari kasallar bilan birinchi ‘kontakt’da bo‘luvchilar hisoblanamiz. O‘zingizga ma’lum, iyun–iyul oylaridan keyin karantin yanada kuchayib, kasallar soni nihoyatda ko‘payib ketdi. O‘sha paytlarda ommaviy axborot vositalari hamda ijtimoiy tarmoqlarda doimiy ‘kim o‘zida tana harorati ko‘tarilish, hid bilish, ta’m bilish yo‘qolganini sezsa, darhol 103 qisqa raqamiga murojaat qiling’, degan xabarlar tarqalgani uchun tinimsiz chaqiruvlar ham ortdi. Bundan tashqari, fuqarolar o‘zlarining hududiga biriktirilgan patronaj hamshiralariga xabar bersa ham, bizga yo‘naltirishardi. Agar hisoblab chiqadigan bo‘lsam, bir kunda o‘rtacha 20 marta chaqiruvga borardim. Bir oyda 7-8 marotaba navbatchilikda turganimni hisoblasak, jami 150 dan ortiq bemor bilan muloqotda bo‘lganman. Bizga murojaat qilgan bemorlarning 80 foizdan ortig‘ini koronavirusga chalinganlar tashkil etardi. Chaqiruvlarda fuqarolar ko‘proq boshim og‘riyapti, qon bosimim ko‘tarildi yoki tushib ketdi, deb aldashardi. Lekin borganimizda kasallik belgilari borligini ko‘rib, virus yuqqanligini aniqlardik. Ularni maxsus markazlarga olib borishga harakat qilardik. Misol uchun, Andijon shahridagi shifoxonalarga ham tinmay kasal tashigan paytlarimiz bo‘ldi. Achinarlisi, ba’zan chaqiruvlarga himoya kiyimisiz borishga majbur bo‘lardik. Sababi rahbariyat o‘z vaqtida himoya vositalarini yetkazib berolmadi. Ko‘pincha bir bemor oldiga borganimizdan keyin kiyimni almashtirishga to‘g‘ri keldi. Lekin chaqiruvlarning ko‘pligidan buning imkoni bo‘lmasdi. Bir kiyim bilan bir nechta chaqiruvlarni o‘tkazib yuborgan kunlarimiz bo‘lgan. Himoya kiyimlarini so‘rasak, mamlakat bo‘ylab yetishmovchilik bor, deyishardi”,— deydi navbatchi hamshira Sevara Yusufbekova.

Bo‘lim feldsheri Odil Rustamovning aytishicha, oktabr oyida bo‘lim feldsheri, 1997-yilda tug‘ilgan Zarnigor Tojimurodova kasallik asoratlari ortidan vafot etgan.

“Faoliyatimiz davomida deyarli 90 foizdan ortiq hamkasblarimiz koronavirus bilan kasallandi. Virus yuqishiga yo‘l qo‘ymaslik harakatida barcha choralarni ko‘rganmiz, biroq doimiy muloqotda bo‘lganingizdan keyin yuqtirmaslikning umuman iloji yo‘q ekan. Kasallik kimdadir yengil o‘tgan bo‘lsa, yana kimlardir og‘ir asoratlar bilan hayot uchun kurashdi. Afsuslanarlisi, kasallik 23 yoshli hamkasbimiz Zarnigor Tojimurodovani ham oramizdan olib ketdi. Yosh edi, kasbini sevardi. Ammo homilador bo‘lgani uchun u kasallikka bardosh berolmadi. Birovlarga yordam beraman deb o‘zini saqlay olmadi. Bularni ich-ichimizdan o‘tkazdik. Mehnatlarimiz uchun minnat qilmaymiz, kasbimiz uchun jonimiz fido. Lekin Prezidentimiz mehnatlarimizni qanchalik og‘irligini bilib turib, qilgan e’tiborini pastdagi amaldorlar bilmayotganidan afsusdamiz. Biz yo‘q narsani emas, qonuniy tartibda berilishi lozim bo‘lgan mablag‘ni so‘rayapmiz, xolos”,— deydi Odil Rustamov.

Marhamat tuman tibbiyot birlashmasi tez tibbiy yordam bo‘limi mudiri Zuhriddin Umarovning ma’lum qilishicha, ushbu masala bo‘yicha xodimlar dekabr oyida murojaat qilgan. Ularning murojaatiga asosan tegishli choralar ko‘rilib, birlashma bosh iqtisodchisiga “vedomost”lar taqdim qilingan.

“Xodimlar bilan dekabr oyining boshida gaplashganman. Ularga tushuntirish bilan birga rahbariyatga ushbu masalani yetkazganman. Viloyat bo‘yicha ayrim tumanlar olgan bo‘lishi kerak. Qolganlarga hali tushmadi. To‘g‘risini aytish kerak, ushbu masalaning yechimi bo‘yicha hali hech kim oxiriga yetgani yo‘q. Hozirda malaka oshirishda qayta tayyorgarlikda o‘qiyapman. Qo‘l ostimda ishlayotganlarni ham tushunaman. Shu sababli o‘qish jarayonida boshqa tumanlardagi hamkasblarimdan nima qilishayotganini bir necha marta so‘raganman. Kimdir oldik, desa yana kimlardir olmaganini aytyapti. Berilishi ko‘zda tutilgan rag‘batlantirish puli budjet hisobidan ajratilmaydi. Shu sababli masalaning yechimi oxiriga yetmayapti. Hattoki bularni tibbiyot birlashmasi hisobchi xonasiga olib borganman. O‘shanda bosh hisobchimiz tegishli tartibda o‘rganib chiqishga va qonuniy hal qilib berishga va’da bergan. Bular ‘vedomost’ni so‘rashganida bolalar tayyorlab hammasini olib kelishdi. Ammo bir-ikki joyida xato bor ekan, noto‘g‘ri deb qaytarib yuborishdi. Xatolarni to‘g‘rilashga ham bir-ikki hafta vaqt ketdi. Hozirda hisobchilarda ro‘yxat turibdi. Qo‘shimcha Vazirlar Mahkamasi qaroridan nusxa va birlashma boshlig‘i buyrug‘ini taqdim etganmiz. Rahbariyat bilan hozir kelishib oldik, tegishli buyruqqa o‘zgartirish kiritib, xodimlarning murojaatlarini 10 kun ichida qonuniy tartibda hal qilib berishga va’da beramiz. Mabodo cho‘zilib ketadigan bo‘lsa, bir oydan oshmaydi”,— deydi tez tibbiy yordam bo‘limi mudiri Zuhriddin Umarov.

Tibbiyot birlashmasi boshlig‘ining davolash ishlari bo‘yicha o‘rinbosari Botir Qayumov lavozimga bir oy avval tayinlanganligini bildirib, “O‘rinbosar bo‘lib tayinlanganimga bir oydan oshdi. 2020-yilning 3-sentabr kuni Vazirlar Mahkamasining 2020-yil 20-iyuldagi qaroriga asosan tegishli buyruq chiqarilgan ekan. Unda tez yordam bo‘limida qo‘shimcha ravishda tun-u kun navbatchilik qiladigan tibbiyot xodimlari va haydovchilaridan iborat mobil brigada tashkil etish va har oy yakuniga qadar brigadalarda ishlovchi xodimlarning lavozim maoshiga qo‘shimcha rag‘batlantirish puli ajratish belgilangan. Buyruq ijrosini ta’minlash bo‘yicha e’tiborsizlikka yo‘l qo‘yibmiz. Vazirlar Mahkamasining 24-sentabrdagi qarori bilan tanishib chiqib, bo‘lim mudiri bilan buyruqqa o‘zgartirish kiritamiz. Haqiqatni aytish kerak, buyruq ijrosining kechikishi faqat bizga bog‘liq emas. Chunki hisobchilarimiz Inqirozga qarshi kurashish jamg‘armasi va moliya bo‘limiga brigadalarning faoliyati bo‘yicha hisobotlarini tashlab borishi kerak bo‘lgan. Mening fikrimcha, ularning o‘rtasida texnik sabablarga ko‘ra aloqalar yaxshi bo‘lmagan bo‘lishi kerak. Yana bilmadim, hisob-kitob bilan shug‘ullanmaganim uchun biror narsa deya olmayman. Bugun-erta buyruqqa o‘zgartirish kiritsak, ijrosi men va bosh iqtisodchimizga yuklanadi. Ijrosini shaxsan o‘zim nazorat qilaman. Moliya hisob raqamimizga qancha tez tushirib bersa, shuncha ishimiz ham tezlashadi”, — deydi tibbiyot birlashmasi boshlig‘i o‘rinbosari Botir Qayumov.

“Daryo” muxbiri bilan bog‘langan tez yordam bo‘limi feldsheri Odil Rustamovning xabar berishicha, surishtiruvdan so‘ng shifokorlarga 20-iyuldan 15-avgust hamda 24-sentabrdan 24-oktabrgacha bo‘lgan davrlar uchun rag‘batlantirish pullari to‘lab berilgan.