Xitoy koinotga tajriba sun’iy yo‘ldoshini uchirdi

Xitoyning janubi g‘arbidagi Sichan kosmodromidan yangi kommunikatsion texnologiyalar tajribaviy sun’iy yo‘ldoshi koinotga uchirildi. Bu haqda Sinxua agentligiga tayanib, “Korrespondent.net” xabar berdi.

Ta’kidlanishicha, sun’iy yo‘ldosh “Chanchjen-3B” (“Buyuk safar-3B”) tashuvchi raketasi yordamida koinotning belgilangan nuqtasiga chiqarildi.

Bu “Chanchjen” tashuvchi raketalari yordamida koinotga olib chiqilgan 360-sun’iy yo‘ldosh bo‘ldi.

Eslatib o‘tamiz, 20-yanvar kuni Xitoy “Tyantun-1-03” mobil aloqa sun’iy yo‘ldoshini uchirgandi. Uni koinotga “Chanchjen-3B” tashuvchi raketasi olib chiqqan. Bu parvoz Xitoyning 2021-yilda amalga oshirilgan birinchi kosmik parvozi bo‘ldi.

29-yanvarda “Yaogan-31” deb nomlangan sun’iy yo‘ldoshlarning ikkinchi — Yerni masofadan turib zondlovchi guruhi koinotga muvaffaqiyatli uchirildi. Bu parvozda “Chenchjen-4C” tashuvchi raketasidan foydalanildi.