Bu haqda xabar bergan “Daryo” muxbirining ma’lumot berishicha, voqea 4-fevral kuni soat 17:30 da sodir bo‘lgan.
“Islom Karimov ko‘chasida joylashgan ushbu ko‘p qavatli uy hali qurilishi tugallanganmagan bo‘lib, aholi ko‘chib o‘tmagan uylar bo‘lgan. Portlash natijasida jarohatlanganlar bor”, — deydi “Daryo” muxbiri.
“Daryo” muxbirining qo‘shimcha qilishicha, ayni paytda Ichki ishlar xodimlari voqea sodir bo‘lgan joydagi aholini xavfsiz huddudga chiqarishga harakat qilmoqda.
Dastlabki ma’lumotlarga ko‘ra, yangi qurilayotgan uyga ko‘chib o‘tish niyatida xonadonga kelgan ayol uyda gaz bor yoki yo‘qligini tekshirib ko‘rishga uringan va gugurt chaqqan. Oqibatda gaz to‘lgan xonadonda portlash sodir bo‘lgan.
“Hatto uy yonidan o‘tib ketayotgan avtobus yo‘lovchilari ham bundan zarar ko‘rgan va ular shifoxonaga yotqizilgan”, — deydi voqea joyida bo‘lib turgan “Daryo” muxbiri.
Qo‘shimcha qilinishicha, portlash sodir bo‘lgan ko‘p qavatli uy qarshisidagi savdo do‘koni ham ko‘p talafot ko‘rgan.
Favqulodda vaziyatlar vazirligining ma’lum qilishicha, jarohat olganlar bir nafardan uch nafargachani tashkil etadi. Qurbonlar haqida hozircha ma’lumot kelib tushmagan.
Izoh (0)