Toshkentda o‘zining transport vositalarida harakatlanib ketayotgan ikki haydovchi o‘rtasiga yuzaga kelgan tushunmovchilik oqibatida ulardan biri ikkinchisini pichoqlab qo‘ydi. Bu haqda Toshkent shahar IIBB axborot xizmati xabar berdi.

Ma’lum qilinishicha, 29-yanvar kuni, taxminan, soat 15:50 larda Uchtepa tumani IIO FMB navbatchilik qismiga 23 yoshli A.N. tan jarohatlari bilan kasalxonaga keltirilganligi haqida xabar kelib tushgan.

Suhbat jarayonida A.N. shu kuni, taxminan, soat 02:30 larda Uchtepa tumanidagi Farhod ko‘chasida o‘zining boshqaruvidagi Nexia-2 rusumli avtomobilida ketayotganida Nexia-1 rusumli avtomobil haydovchisi bilan “yo‘l talashish” oqibatida o‘zaro nizo kelib chiqqanligini ma’lum qilgan. Janjal oqibatida Nexia-1 haydovchisi 26 yoshli O.K. o‘zining avtomobili salonidan pichoq olib, A.N.ga tan jarohati yetkazgan hamda hodisa joyidan yashiringan.

Tezkor tadbir natijasida O.K. ushlangan va unga nisbatan Jinoyat kodeksining 277-moddasi 2-qismi “v” bandi (bezorilik) alomatlari bilan jinoyat ishi qo‘zg‘atilgan. Uning boshqaruvidagi Nexia-1 rusumli avtomobil ayrim tergov harakatlarini o‘tkazish uchun Uchtepa tumani IIO FMB binosiga joylashtirilgan.

Avvalroq Namanganda mast mijoz nasiyaga pitssa berishni istamagan kafe egasini pichoqlagani, Toshkentda 17 yoshli maktab o‘quvchisi o‘z otasini pichoqlab o‘ldirib qo‘ygani, Qashqadaryoda mast erkak xotini va qaynsinglisini pichoqlagani, shuningdek, buxorolik ayol rashk sabab erini pichoqlab qo‘ygani to‘g‘risida xabar berilgandi.