O‘zbekistondagi OTMlarda 2020/2021-o‘quv yilidan kredit-modul tizimini joriy etish boshlangan. Oliy va o‘rta maxsus ta’lim vazirligi bosh boshqarma boshlig‘i Abduvali Xolikovning AOKAda o‘tkazilgan brifingda ma’lum qilishicha, o‘quv yili davomida fanlardan o‘z vaqtida baho olmagan talabalar uchun pulli qo‘shimcha semestr tashkil etiladi.
Boshqarma boshlig‘i o‘quv haftalari 38−40 haftadan 36 haftaga tushirilganini ta’kidlagan. Bu bilan akademik dars jarayonlari 10 oydan 7,5−8 oyga qisqargan.
Har bir semestrda 15 hafta bo‘ladi. Bu 18 haftani tashkil etishi ham mumkin, u holda dastlabki ikki hafta talabalar tomonidan o‘zlashtirilmagan fanlar uchun, yana bir hafta — fanlar va o‘qituvchilarni tanlash uchun ajratiladi.
Abduvali Xolikov o‘quv jarayoniga uchinchi, yozgi semestr ham qo‘shilganligiga to‘xtalib o‘tgan.
“Bu — ta’til davriga to‘g‘ri keladi va talabalarning arizasiga ko‘ra, fanlardan baho olmaganlar uchun tashkil etiladi. Uchinchi semestr uchun ariza bergan talabalar belgilangan tartibda qo‘shimcha mablag‘ni amalga oshiradi. Hozircha bu tizim bo‘yicha savollar bo‘lyapti, ammo uch yildan so‘ng barcha bu tizimga to‘liq moslashadi”, — dedi u.
Bu tizim 2020/2021-o‘quv yilida 46 ta OTMda yo‘lga qo‘yilgan. Ushbu tartib bosqichma-bosqich boshqa OTMlarda ham joriy qilinadi.
Eslatib o‘tamiz, 2020-yil aprel oyida “Sharqshunoslik sohasida kadrlar tayyorlash tizimini tubdan takomillashtirish va ilmiy salohiyatni oshirish chora-tadbirlari to‘g‘risida” Prezident qarori bilan Toshkent davlat sharqshunoslik instituti negizida Toshkent davlat sharqshunoslik universiteti tashkil etilgan, hujjatda universitetda ta’lim jarayoni bosqichma-bosqich kredit-modul tizimi asosida amalga oshirilishi belgilangandi.May oyida esa Toshkent temiryo‘l muhandislari instituti, Toshkent avtomobil yo‘llarini loyihalash, qurish va ekspluatatsiyasi instituti va Toshkent davlat texnika universitetining aviakosmik texnologiyalari fakulteti negizida Toshkent transport universiteti tashkil etilishi, 2020/2021-o‘quv yilidan universitetda kredit-modul ta’lim tizimi joriy qilinishi haqida xabar berilgan.
Iyun oyida jamoatchilik muhokamasiga qo‘yilgan “Andijon qishloq xo‘jaligi va agrotexnologiyalar instituti faoliyatini tashkil etish hamda agrar ta’lim tizimini yanada takomillashtirish chora-tadbirlari to‘g‘risida”gi Prezident qarori loyihasida ham institutda bakalavriat ta’lim yo‘nalishlarida ta’limning kredit-modul tizimini bosqichma-bosqich joriy etilishi xususida ma’lumot berilgandi.