Jinoyat ishlari Asaka tuman sudi 28 yoshli ayolning uyiga bostirib kirib, uning qo‘li va og‘zini skotchlab pul talab qilgan 19 yoshli fuqarolarga hukm o‘qidi. Bu haqda viloyat sudi sudya katta yordamchisi Komronshoh Rasulovga tayanib, “Daryo” muxbiri Umidjon Mamarasulov xabar berdi.
Ma’lum qilinishicha, 2020-yilning 24-avgust kuni soat 22:30 larda 19 yoshli, ishsiz Rustam Ma’rufjonov (ism-familiyalar o‘zgartirilgan) hamda Topvoldi Anvarov yuzlariga niqob taqib, Asaka tumani “Otish” mahallasida yashovchi Furqat Nurilloyevning uyiga devor oshib kirgan. Uning turmush o‘rtog‘i Imona Nurilloyeva hamda voyaga yetmagan uch nafar farzandi uxlab yotgan xonaga bostirib kirib, Imona Nurilloyevaga pichoq o‘qtalib, qo‘li, og‘zi va yuzini skotch bilan bog‘lab, pul berishini talab qilgan. Talab qilingan pullarni bermasa, o‘zi va farzandlarini o‘ldirib yuborish bilan tahdid qilgan. Xonadon bekasi pul yo‘qligini aytganda esa ikkovlon uning yuz va tanasining to‘g‘ri kelgan joylariga qattiq zarb bilan urib tepgan. Zo‘rlik va tahdidlardan qutulish maqsadida ayol bosqinchilardan birining chap qo‘l barmoqlarini tishlab olib, shovqin ko‘targan. Natijada jinoyatchilar jinoiy harakatlari oshkor bo‘lishidan qo‘rqib, voqea joyidan yashiringan.
“2018-yildan Asror aka va otishlik Furqat akaga shogird tushib, undan issiqxona qurishni o‘rganganmiz. O‘sha yili usta bilan birga Xorazm va Qashqadaryoga ham borib ishlaganmiz. 2019-yilning noyabr oyida yana ustaning ukasi Ulug‘bek, o‘rtoqlari Abdulla, Kamoliddin, Davronbek, Imomali va boshqalar bilan Samarqandga ishlash uchun borganmiz. Ammo hech qancha o‘tmasdan kunlar sovib, qor yog‘ganligi sababli u yerdan Imomali va Abdulla bilan qaytib kelganmiz. Qolgan sheriklarimiz esa o‘sha yerda qolib, ishni davom ettirishgan. Kelganimizdan keyin 10 kuncha o‘tib, Furqat akani yoniga borib, undan ishlagan kunlarimizga pul berishini so‘raganmiz. O‘shanda biz kuniga o‘rtacha 90-100 ming so‘m atrofida ishlaganmiz deb, ustaga 1 million 800 ming so‘m atrofida haqimiz borligini aytganmiz. Biroq Furqat aka ishni oxiriga yetkazmasdan qaytib kelganimiz, qurilgan issiqxonalari qulab tushganligini, shu sababli pul olmaganligini va oylik bermasligini aytgan. Shundan keyin ham orada u bilan telefon orqali aynan shu masalada gap tortishib janjallashdik. O‘shanda u bizga pul bermasligini, qo‘limizdan kelganini qilishimizni aytgan. Mana shu sabab bo‘lib oshnam bilan oyligimni olish uchun uning uyiga bostirib kirganmiz. Bugun qilgan ishim noto‘g‘ri ekanligini tushunib yetdim”, — deydi sudlanuvchi Rustam Ma’rufjonov.
Sud hukmiga ko‘ra, sudlanuvchilar Jinoyat kodeksining 164-moddasi 3-qismining “v” (bosqinchilik) bandida nazarda tutilgan jinoyatni sodir etganlikda aybli deb topilib, Rustam Ma’rufjonovga 11 yil, Topvoldi Anvarovga esa 10 yil 6 oy ozodlikdan mahrum qilish jazosi tayinlangan.
Izoh (0)