Norvegiya parlamenti a’zosi Petter Eyde Black Lives Matter (BLM) harakatini 2021-yilgi tinchlik bo‘yicha Nobel mukofotiga nomzod sifatida ilgari surdi, deb xabar beradi “RIA Novosti”.
Parlamentariy o‘zining bu kabi qarorini BLM’ning tizimli o‘zgartirishlarga bog‘liq chaqiriqlari butun dunyo bo‘ylab tarqalgani bilan izohlagan. Mukofotga ilgari surish arizasida Eyde BLM AQShdan boshqa mamlakatlarni ham irqchilikka qarshi kurashishga da’vat etganini ta’kidlagan.
“Menimcha, Amerikada, shuningdek, Yevropa va Osiyoda duch kelgan asosiy muammolarimizdan biri — bu tengsizlikka asoslangan mojarolarning avj olishi bo‘ldi. Black Lives Matter irqiy tengsizlikka qarshi kurashda dunyodagi eng muhim harakatga aylandi”, — deydi Eyde. Uning fikricha, BLM tarafdorlari irqiy adolatsizlik borasida global xabardorlikni oshirishda ulkan yutuqlarga erishgan.
Shuningdek, Eyde ushbu harakatning Amerika shaharlarida sodir etilgan zo‘ravonliklar ortida turgani to‘g‘risidagi tanqidlarni rad etgan.
“Tekshiruvlar shuni ko‘rsatdiki, Black Lives Matter tomonidan tashkillashtirilgan namoyishlarning aksariyati tinch o‘tgan”, — deya qo‘shimcha qiladi parlamentariy.
Ma’lumot uchun, AQShda doimiy ravishda irqchilik va politsiya zo‘ravonligiga qarshi namoyishlar bo‘lib turadi. So‘nggi yillardagi eng yirik namoyishlar 2020-yil may oyining oxirida Jorj Floydning o‘limidan keyin yuz bergan ko‘cha namoyishlari bo‘ldi. Namoyishlar mamlakatning ko‘plab shaharlarida Black Lives Matter ( “Qora tanlilarning hayoti muhim”) harakati doirasida bo‘lib o‘tdi.
Eslatib o‘tamiz, 2020-yilda tinchlik bo‘yicha Nobel mukofoti BMTning Butunjahon oziq-ovqat dasturiga berilgan edi.
Izoh (0)