Jazoni ijro etish xodimlari shaxsiy videoregistrator (bodikamera) bilan xizmat o‘tashlari joriy qilinadi. Bu haqda 28-yanvar kuni AOKAda bo‘lib o‘tgan matbuot anjumanida Jazoni ijro etish bosh boshqarmasi Tarbiyaviy va ijtimoiy psixologik ishlarni tashkil etish boshqarmasi boshlig‘i Jamshid Sultonov ma’lum qildi.
“Jazoni ijro etish muassasalarida xodimlar shaxsiy videoregistratorlar bilan xizmat o‘tashlari joriy qilinmoqda. Bugungi kunda 36 to‘plam bodikamera xarid qilinib, Toshkent viloyati Zangiota tumanidagi jazoni ijro etish muassasasida test rejimida sinovdan o‘tkazilmoqda”, – dedi Jamshid Sultonov.
Ta’kidlanishicha, jazoni ijro etish tizimiga IT-texnologiyalarni joriy etish, jazo muddatini o‘tayotgan mahkumlar va ularning oila a’zolariga qulaylik yaratish maqsadida mahkumlarning qarindoshlari va boshqa shaxslar bilan bo‘lib o‘tadigan uchrashuvlari videokonferensaloqa rejimida onlayn tarzda o‘tkaziladi.
Masofali videouchrashuv jarayonida mahkumning qarindoshlari va boshqa shaxslar bilan muloqotlari to‘g‘ridan to‘g‘ri translyatsiya orqali amalga oshirilishini ta’minlash maqsadida barcha jazoni ijro etish muassasalari optik tolali aloqa kanallari bilan ta’minlangan.
Avvalroq jazo muddatini o‘tayotgan mahkumlarni saqlash sharoitlarining shaffofligini ta’minlash hamda qiynoq va jismoniy tazyiq o‘tkazish bilan bog‘liq salbiy holatlarning oldini olish maqsadida tizimdagi 54 ta jazoni ijro etish muassasalari 3 ming 280 ta zamonaviy videokuzatuv moslamalari bilan jihozlangan. Shundan 2 ming 203 tasi jazoni ijro etish muassasasi yashash sahniga, 432 tasi ishlab chiqarish sahniga, 645 tasi tashqi ma’muriy hududga o‘rnatilganligi haqida xabar berilgandi.
Izoh (0)