Neslihan Atagul “Elchining qizi” serialini salomatligi borasidagi muammolar sababli tark etgach, loyihada katta o‘zgarishlar yuz bergani ma’lum qilingan edi. Masalan, Neslihan tufayli ssenariyga kiritilgan o‘zgartirishlar sabab Uraz Kaygilaro‘glu ham loyihani tark etadi. Natijada serialning syujeti keskin o‘zgarib ketgan. Unga ko‘ra, kartinada Tuba Buyukustun hamda Engin Akyurek juftligi paydo bo‘ldi. Ssenariy esa tez orada qayta yozilishi kutilmoqda, deb xabar beradi “KinoTeka”.
Buyukustun bundan avval “Pul va gul ishqi” serialida birgalikda rol ijro etgan Engin Akyurek bilan serialning xaloskori bo‘lishiga rozi bo‘ldi. Allaqachon suratga olish ishlari davom etayotgan serialga to‘satdan kirib borish odati bo‘lmagan aktrisa hamkasblarini qiyin ahvolda qoldira olmadi, shuning uchun ham loyihada ishtirok etish taklifini qabul qildi.
Ma’lum bo‘lishicha, aktrisaga loyihada ishtirok etishi uchun “O3 Medya” 3 million turk lirasi, ya’ni 400 ming dollarga yaqin pul to‘lagan. Shuningdek, har bir suratga olingan epizod uchun Buyukustunga 200 ming turk lirasi – 27 ming dollar to‘lanadi. Bundan tashqari, u serialning chet elda sotilishining foizini olish uchun ham shartnoma imzolagan. Ba’zi xabarlarga ko‘ra, uning partnyori Engin Akyurek ham shuncha miqdorda gonorar oladi. Yaqin Sharq va Lotin Amerikasi ushbu loyihaga allaqachon qiziqish bildirgan, shuning uchun ham prodyuserlar katta pul sarflamoqda.
Oradan bir necha yil o‘tib, ikki yulduz “Elchining qizi” serialida yana birga ishlaydi. Bu serial reytingiga yordam beradimi yoki yo‘q, hozircha ma’lum emas. Ammo Buyukustun “Elchining qizi” serialiga qo‘shilishi uchun qo‘ldan kelgan barcha ish amalga oshirilgan. Yaqinda uning o‘zi ham serialda chiqishini ijtimoiy tarmoqlarda e’lon qilgan. Uning ishtirokidagi ilk sahnalar dam olish kunlarida suratga olingan.
Aytgancha, serial nomi o‘zgaradimi, degan savol barchani o‘ylantirmoqda. Elchining qizi yo‘qligi sababli loyihaning nomi o‘zgarishi ham mumkin. Hozircha film ijodkorlari bu haqda aniq qarorga kelmagan.
Mavzuga doir:
Izoh (0)