“Sening statistikang bir tiyinga qimmat”. Zlatan Ibragimovich va Mino Rayolaning hamkorlik tarixi haqida

Mashhur futbol agenti Mino Rayola o‘z faoliyatini oilaviy italyan restoranida oddiy xodim sifatida boshlagan. 2020-yil oxiriga kelib esa Forbes uni operatsiyalardagi komissiyalar bo‘yicha dunyodagi eng yaxshi sport agentlari beshligiga kiritdi. Uning mijozlari orasida Pol Pogba, Erling Holand, Matteys de Ligt, Janluiji Donnarumma kabi nomdor futbolchilarni uchratish mumkin. Bunday ro‘yxatga hatto Jorje Mendesh (Krishtianuning agenti) ham havas qilishi mumkin. Biroq Rayolaning mijozlaridan biri alohida e’tiborga loyiqdir. Uning ismi – Zlatan Ibragimovich.

39 yoshda odatda ko‘plab futbolchilar faoliyatini yakunlashga taraddud ko‘ra boshlaydi va Osiyo yoki MLS tomon yo‘l oladi. Ibra esa bu paytda xuddi 25 yoshdagidek Italiya A Seriyasini yondirib tashlamoqda. Ehtimol, faqat g‘oliblik xarakteriga ega bo‘lgan dadil va o‘ziga ishongan shvedgina Rayola kabi murakkab odam bilan teng sharoitlarda muloqot qilishi mumkin. Xo‘sh, barchasi qanday boshlangan edi o‘zi?

20 yilga orqaga qaytamiz. Amsterdam. Iqtidorlar bilan to‘la “Ayaks” 2000-yillarning boshlarida Kristian Kivu, Uesli Sneyder, Rafael van der Vart va boshqa ko‘plab yulduzlarni dunyoga tanitgan. Ular orasida Zlatan uchun ham joy bor edi, ammo o‘sha paytda Niderlandiyada ishlagan ko‘plab agentlardan farqli o‘laroq, Mino dastlab shved bilan shartnoma imzolashga urinmagan. Rayola “Ayaks”da juda ko‘p mijozlarga ega edi, xususan, braziliyalik yosh himoyachi Maksvell bilan. Aynan Maksvell bu jamoada Ibragimovichning eng yaqin do‘stlaridan biri edi. Kunlarning birida “Ayaks”dan mashhurroq klubga o‘tishni istagan Ibra braziliyalik do‘stidan o‘zini Rayola bilan uchrashtirishni so‘raydi. Uchrashuv Amstel kanali yaqinidagi “Okura” mehmonxonasida bo‘lib o‘tadi.

Uchrashuv joyi juda hashamatli ko‘rinardi, shuning uchun Zlatan Rayolani atrofga mos bo‘lishini tasavvur qiladi. Porsche haydab kelgan, Gucci kurtkasidagi Rolex soatli Ibraning taxminlari o‘zini oqlamadi. Uning yonida oddiy futbolka va jinsida to‘ladan kelgan o‘rta bo‘yli odam paydo bo‘ldi.

“Sen shunchalik kam gol urasanki, bu o‘yin uslubing bilan sirkda ish topishing osonroq kechardi”, – deydi Rayola Ibraga.

Rayola tashqi qiyofa va hashamat bilan o‘zini hayron qoldirib bo‘lmasligini aniq aytadi va Zlatandan Porsche’ni Fiat’ga o‘zgartirishni, Rolex’ni esa seyfga qo‘yishga ko‘ndiradi. Dunyoning eng yaxshisi bo‘lish uchun shved hamma narsadan voz kechishi va o‘zini futbolga 100 foizga bag‘ishlashi kerak edi.

“Sen mashinalaring, soatlaringni sotasan va uch baravar ko‘proq mashq qilasan. Chunki sening statistikang bir tiyinga qimmat”,

Albatta, dastlab Ibra uchun qimmatbaho narsalardan voz kechish mushkul kechdi, ammo Rayoladan o‘tgan sovuqqonlik shvedning hayotga bo‘lgan qarashlarini o‘zgartirishga va futboldagi kelajagi to‘g‘risida jiddiyroq o‘ylashga majbur qildi. Shundan keyin unda g‘oliblik ruhi shakllandi va har qanday vaziyatda ham o‘zini to‘laligicha bag‘ishlashga odatlandi. Hatto mashg‘ulotlarda ham.

Bir safar “Utrext”ga qarshi o‘yinda “Ayaks”ning o‘sha paytdagi bosh murabbiyi Ronald Kuman Ibragimovichni almashtiradi. Shunda u shu qadar g‘azablanadiki, hatto reklama ustunlarini tepishgacha boradi. O‘sha paytda Zlatanda har doim o‘yinlardan so‘ng Minoga qo‘ng‘iroq qilish odati bor edi, ammo bu safargi suhbat uning taqdirini o‘zgartirib yuboradi. Suhbat davomida “Ayaks”dan ketish istagi haqidagi gapga javoban shved quyidagilarni eshitadi: “Ushbu holatda sen Turinga borishing mumkin”. Shu tariqa 2004-yilning 31-avgustida Zlatan 16 million dollar evaziga “Yuventus”ga transfer qilinadi.

Shundan so‘ng Zlatanning faoliyatida yangi davr boshlandi. Italiyaning uch grandi –  “Barselona”, PSJ, “Manchester Yunayted” bilan muvaffaqiyat, Shvetsiya terma jamoasidagi yetakchilik va bir qancha sovrinlar.

Rayola bilan uzoq muddatli munosabatlar, shubhasiz, Ibragimovichning futbol dunyoqarashiga ta’sir o‘tkazdi. Yosh o‘z so‘zini ayta boshladi – shved tobora ko‘proq jarohat olardi, ammo futbolga bo‘lgan muhabbat doimo ustunlik qilardi. Shu tariqa 2017-yilda ehtimoliy nafaqa haqida hech qanday gap bo‘lishi ham mumkin emasdi.

“U yana 5–6 yil o‘ynashi mumkin. Men uning faoliyatini yakunlashiga yo‘l qo‘ymayman, endi u men uchun ishlashi kerak. Farzandlarim katta bo‘lib qoldi, menga pul kerak”.

MLS’ga (“Los-Anjeles Gelaksi”) qilingan sayohat ham Ibragimovichning faoliyatiga nuqta qo‘ymadi. 39 yoshga kelib, u nafaqat futbol o‘ynamoqda, balki o‘z buyukligini ham isbotlash bilan birgalikda jamoaga natija olib kelish istagiga ham to‘la. Va nihoyat, Rayolaning ta’siri ostida bir paytlar dangasalik va hashamatni sevadigan kishi o‘zida eng kuchli fazilatlarni shakllantira oldi, bu esa unga hayotining beshinchi o‘n yilligi ostonasida ham futbolda navqiron bo‘lib qolish imkonini bermoqda.

“Bizning munosabatlarimiz juda yaxshi. Zlatan bilan biz aqlbovar qilmaydigan sarguzashtlarni boshdan kechirganmiz. U ko‘ringanidek badjahl odam emas”, – deydi Rayola Zlatan haqida.

Oradan 10 yil o‘tib “Milan”ning Skudetto haqidagi o‘ylari endi utopik bo‘lib ko‘rinmayapti, boisi Stefano Pioli jamoasida ko‘p to‘siqlarni yengib o‘tgan qat’iyatli Zlatan mavjud. Va ehtimol, Zlatan ushbu potensial g‘alabasini “telbanamo” og‘aynisi Mino Rayolaga bag‘ishlaydi.

Manba