Oliy Majlis Qonunchilik palatasi deputati Rasul Kusherbayev “O‘zavtosanoat” 100 gektarlik sug‘oriladigan yer maydonini beg‘araz hamda auksionsiz qo‘lga kiritmoqchi ekanligini tanqid qildi.
Imtiyozlar iqtisodiyotda halol raqobatning yo‘qolib, iste’molchilarga tanlovsiz, sifati past mahsulot va xizmatlardan majburan foydalanishga olib kelishi mumkin.Eslatib o‘tamiz, Shavkat Mirziyoyev 13-yanvar kuni mashinasozlik tarmog‘ini transformatsiya qilish va sohada raqobatni rivojlantirish masalalari bo‘yicha yig‘ilish o‘tkazgan edi. Yig‘ilish yakunlangandan so‘ng, Monopoliyaga qarshi kurashish qo‘mitasi rahbari Najmiddinxo‘ja Sharipov ayrim avtomobil ishlab chiqaruvchilarga berilgan imtiyozlar va eksklyuziv huquqlarni qisqartirish kerakligini ta’kidlagandi.Afsuski, so‘nggi vaqtlarda ayrim monopolistlarga berilayotgan alohida ustun huquqlar aholi ijtimoiy kayfiyatiga salbiy ta’sir o‘tkazmoqda.
Chunki aholi shu sohada o‘zi istagan sifatli, arzon mahsulot va xizmatdan foydalana olmayapti. Bular qatoriga boqimanda “O‘zavtosanoat” tarkibidagi korxonalarga berilayotgan imtiyozlar ham kiradi.
O‘zbekiston Prezidentining “Maxsus sanoat zonasi ‘Andijon viloyati sanoat xabi’ni tashkil etish chora tadbirlari to‘g‘risida”gi ID-26203 (V-1) qarori loyihasida ko‘zda tutilgan imtiyozlar shunday xulosaga olib kelayapti: halol va teng sharoitda ishlashga ishongan korxona o‘z maqsadlariga Prezident nomidan foydalanib erishmaydi.
Loyihadagi toqat qilib bo‘lmas vaziyat: ayrim yurtdoshlarimiz ilojsizlikdan bir parcha sug‘oriladigan yerda “o‘zboshimcha”, deb topilayotgan boshpanalarining buzilishidan hadiksirab kun o‘tkazayotgan bir vaqtda uzoq yillar shohona imkoniyat va imtiyozlar qurshovida yashagan “O‘zavtosanoat”ga (Sanoat xabi) yana 100 gektarlik sug‘oriladigan yer maydoni beg‘araz berilmoqchi. 5-6 sotixmas, 100 gektar.
Kulgilisi, oziq-ovqat xavfsizligiga “o‘zboshimcha” uy qurib yashayotgan kambag‘al aholi xavf solayapti, deb bong uramiz, kambag‘alni qiynaymiz. Yuzlab gektar sug‘oriladigan yerlarni egallayotgan monopolistlar esa oppoq, ideal.
Bu ham yetmagandek hamma yerni auksion orqali olsa, “O‘zavtosanoat” auksionsiz olmoqchi.
“Prosta” bez emas, sal bet bo‘lishi kerak.
Yana bir gap “O‘zavtosanoat” ta’sis etadigan korxona 100 gektar yerdan tashqari 2023-yil 1-yanvarga qadar import qilinadigan qurilish materiallari, uskunalar, qurilish texnikasi, butlovchi buyumlar, ehtiyot qismlar, metall konstruksiyalarini xorijdan olib kelishda bojxona to‘lovlaridan ozod bo‘lmoqchi. Yana imtiyoz...
Umid qilamanki, adolatli, kuchli fuqarolik jamiyati qurish yo‘lida ketayotgan bir vaqtda “bir to‘da” ko‘zga ko‘rinmas shaxslarning lobbizmi ekanligi ko‘rinib turgan bunday loyiha qabul qilinmaydi.
Rasul Kusherbayev, Oliy Majlis Qonunchilik palatasi deputati
Izoh (0)