Saudiya Arabistoni investitsiyalar vaziri Holid al-Falih boshchiligidagi delegatsiya O‘zbekistonga tashrif buyurgani to‘g‘risida xabar berilgandi. O‘zbekistondagi qator vazirlik va idoralar uchrashuvlar o‘tkazayotgan Saudiya delegatsiyasi vakillari mehnat vaziri Nozim Husanov bilan migratsiya masalalarda fikr almashdi.
Ta’kidlanishicha, muzokaralar davomida O‘zbekistondagi Saudiya Arabistoni korxonalari qatnashadigan energetika loyihalarida mahalliy ishchilar ishtirok etishi kelishib olingan. Shuningdek, Saudiya Arabistoniga ishlagani bormoqchi bo‘lgan o‘zbekistonliklarga til va kasb o‘rgatish markazlari ochilishi muhokama qilingan.
Mehnat vaziri Nozim Husanovning so‘zlariga ko‘ra, Saudiya Arabistoni ishtirokidagi loyihalar doirasida saudiyalik mutaxassislar O‘zbekistonga kelib, mahalliy xodimlarga ish o‘rgatishi ham nazarda tutilgan. Husanov ishchilarni Saudiyaga yuborishda asosiy muammo til ekanini aytib, bu borada tomonlar birgalikda ish olib borishini ma’lum qilgan.
Eslatib o‘tamiz, Rossiya IIV mamlakatda migrantlar soni kamayib ketganini ma’lum qilgandi. 2020-yil dekabr oyining o‘rtalarida Rossiya Qurilish vazirligi mehnat muhojirlarining mamlakatga kirishini soddalashtirish taklifi bilan chiqqandi. Mamlakat prezidenti Vladimir Putin Rossiya qurilish ishlariga mehnat migrantlarini jalb qilishni soddalashtirishga ko‘rsatma berdi.
Izoh (0)