Qirolicha bilan kechki ovqat: Merilin Monro, Anjelina Joli va Yelizaveta II bilan uchrashgan yana boshqa mashhurlarning noyob suratlari

San’at olamida o‘z o‘rniga ega va millionlab muxlislari bor yulduzlarining hammasi ham qirolicha bilan uchrashavermaydi. Quyida Yelizaveta II bilan uchrashish baxtiga muyassar bo‘lgan mashhurlar suratlarini e’tiboringizga havola etamiz.

Ava Gardner

Aktrisa yosh qirolicha bilan 1955-yilda ko‘rishgan. Mazkur muhim uchrashuv uchun Ava uzun qora libos va oq qo‘lqop tanlagan.

Merilin Monro

1956-yilda Merilin Yelizaveta II bilan ko‘rishish uchun ipakdan tikilgan, yelka qismi ochiq, uzun libos, aksessuar sifatida esa uzun qo‘lqop tanlagan.

Rakel Uelch

Aktrisa qirollik oilasi vakili bilan uchrashish uchun oq libos va xuddi shu rangdagi qo‘lqop tanlagan.

Katrin Denev

1966-yilda qirolicha bilan uchrashish uchun Katrin qizil kashta tushirilgan oq libosni afzal bilgan. Sochlarini tepadan yig‘ib, libosi rangida zirak taqqani esa obrazini yanada uyg‘un ko‘rsatgan.

Barbra Streyzand

1975-yilda qirolicha bilan uchrashish uchun boshqalarnikidan farqli libosni ma’qul bilgan. Kumushrang, kapyushonli libos bilan u darhaqiqat o‘ziga xos ko‘ringan.

Elizabet Teylor

1976-yilda Teylor ilk marta qirolicha bilan ko‘rishish baxtiga muyassar bo‘lgan. Buning uchun aktrisa yaltiroq och yashil rangdagi libos kiyib, unga mos taqinchoq taqqan.

Meril Strip

Aktrisa qirolicha bilan 1980-yilda “Kramerga qarshi Kramer” filmining premyerasida uchrashgan. Strip did bilan tikilgan oq libos bilan xuddi shu rangdagi qo‘lqop taqqan.

Jennifer Lopes

Jey Lo 2001-yilda qirolicha bilan ko‘rishish uchun garderobidagi yashil ipakdan tikilgan libosni tanlagan va kiyimiga uyg‘un aksessuarlar bilan yanada jozibali ko‘rinishga ega bo‘lgan.

Madonna

Madonna Yelizaveta II bilan 2002-yilda “Die another day” filmining premyerasi bahonasida ko‘rishgan. Uning qora yaltiroq libosi va uchli qora tuflisi esda qolarli obrazda bo‘lishiga sababchi bo‘lgan.

Deniel Kreyg

Aktyor 2006-yilda hazrati oliyalari bilan uchrashish uchun qora smoking kiyishni ma’qul deb bilgan.

Enrike Iglesias

Boshqalardan farqli ravishda xonanda qirolicha bilan 2007-yilda ko‘rishganida jinsi shim, oq ko‘ylak va qora kostyumda bo‘lgan.

Anjelina Joli

2014-yilda maftunkor aktrisa qirolicha bilan shunchaki ko‘rishmagan. U harbiy mojaroli hududlarda ayollarga nisbatan zo‘ravonlikka qarshi kurashgani uchun Yelizaveta II tomonidan taqdirlangan.