“Chelsi” — o‘z tizimining asiri. Frenk Lempardga imkoniyat berilmagani haqida

“Chelsi”dagi futbolchilik faoliyati davomida Frenk Lempard murabbiylarning iste’fosini yetarli darajada ko‘p marotaba ko‘rgan. Klub xo‘jayini Roman Abramovich murabbiylar bilan muddatidan oldin xayrlashish uchun naq 110 million funt sarflagan. Luis Felipe Skolariga tayinlanganidan yetti oy o‘tmay chiqish eshiklari ko‘rsatilgan bo‘lsa, Andre Villash-Boash “yangi Mourinyo” sifatida kelib, atigi 256 kundan so‘ng klub bilan xayrlashgandi. Roberto di Matteo esa klub uchun orziqib kutilgan Chempionlar Ligasida g‘olib chiqishning uddasidan chiqqandi, biroq olti oydan so‘ng u ham narsalarini yig‘ib, jamoa bilan xayrlashdi.

Italiyalikning holati ko‘p narsadan dalolat beradi. Olti yil davomida klubda o‘ynagan va yevrokuboklarda g‘olib chiqqan odam ishdan bo‘shatilganidan so‘ng “Chelsi” rahbariyatiga an’ana, oila va boshqa jihatlar ahamiyatsiz ekani aniq bo‘ldi. Robertoga biroz ko‘proq vaqt berish va, ehtimol, go‘zal tarixga ega bo‘lish mumkin edi, ammo klub aniq prinsiplarni bayon qildi: natija birinchi o‘rinda.

Ayni paytda ham shu holat takrorlanmoqda. APLning so‘nggi 8 ta o‘yinida “Chelsi” bor-yo‘g‘i “Vest Hem” va “Fulhem” ustidan g‘alabaga erishdi, bu esa o‘z navbatida inqirozga o‘xshaydi. Ammo murabbiyni shunday lahzada ishdan bo‘shatish boshliqlarning ochko‘z ekanligini yana bir bor isbotladi: Lempard birinchi jiddiy to‘siqdayoq haydaldi, bunga asosiy sabablardan biri Chempionlar Ligasidan quruq qolish ehtimolidir.

Frenk avval ham bularning barchasini boshdan kechirgan. 2014-yilda klubning eng yaxshi to‘purari bilan shartnoma imzolanmadi, ammo Lempard sustlashmadi va “Manchester Siti” bilan hamkorlikka kirishdi. Shu sababli “Chelsi”ga murabbiy sifatida qaytgach, Lempard o‘z nomi va afsonaviy o‘tmishi unga avvalgilardan ko‘ra ko‘proq “hayot” bermasligini tushunardi. Bu Sulsherning barqaror ish olib borishini kutishga tayyor bo‘lgan “Manchester Yunayted” emas.

“Manchester Yunayted” ma’lum muddat sabr qildi va hozirda jadvalning eng yuqori qismida bormoqda, biroq “Chelsi” hamma narsaning hozir va shu yerda bo‘lishini xohlaydi. “Ko‘klar” muammoga duch kela boshlasa, hech kim murabbiyning istiqboli va salohiyati bilan qiziqib o‘tirmaydi, hatto gap Lempard singari odam haqida ketsa ham. Natijada jamoada har qanday mutaxassisni o‘z domiga tortib ketadigan girdob paydo bo‘ladi.

Frenkning murabbiylik faoliyati uchun bunday o‘zgarish yaxshi tomondan ta’sir qilishi mumkin. Boisi hozirgi “Chelsi”da u hech qachon jarayonni to‘liq boshqarolmas edi. London klubida murabbiyning fikri hal qiluvchi ahamiyatga ega emas: u faqat futbolchilarni ruhlantirishi va ularga omad tilashi mumkin. The Athletic xabariga ko‘ra, 2020-yilning yozida amalga oshirilgan oltita transferdan Lempard faqat Ben Chilluelni (“Lester”) xohlagan ekan.

So‘nggi vaqtlarda muxlislar va jurnalistlar Frenkni tanqid ostiga ola boshladi: klub 250 million funt sarfladi, ammo hech qanday natija yo‘q. Agar “Byornli”dan Jeyms Tarkovski va “Vest Hem”dan Deklan Rays “Chelsi”ga kelganida edi, Lempardga e’tiroz bildirsa bo‘lardi. Chunki yosh mutaxassis aynan ushbu futbolchilarni jamoada ko‘rishni istagandi. Ammo jamoa rahbariyatining boshqa rejalari bo‘lgan.

2020/2021-yilgi mavsum boshlanishidan oldin Lempard rahbariyatni chempionlik uchun kurashga umid qilmaslik haqida ogohlantirgandi. Axir, qimmatbaho xaridlarga joy ajratish uchun asosiy tarkibning yarmini o‘zgartirish lozim edi. Ma’lumki, hech bir murabbiy tezda bunday vazifani uddalay olmaydi. Yangi kelgan olti nafar futbolchidan beshtasi umuman boshqa chempionatlardan kelgani hisobga olinsa esa, vaziyat yana-da murakkabroqdek ko‘rinadi.

Shuni unutmaslik kerakki, Lempard klubga transfer taqiqi qo‘yilgan vaqtda taklif qilingandi. Hech qanday kuchaytirishlarsiz u jamoani birinchi mavsumdayoq Chempionlar Ligasiga olib chiqa oldi. Frenk tarkibga ko‘plab klub tarbiyalanuvchilarini jalb qilib bordi va natijaga millionlab dollarlik sarmoyalarsiz ham erishish mumkinligini isbotladi. “Chelsi” pulga to‘la qop maqomidan abadiy qutulishi ham mumkin edi, ammo transfer taqiqi olib tashlanishi bilanoq hammasi o‘z joyiga qaytdi.

Ehtimol, Lempard yangi kelganlarga qanday yondashish kerakligini topgan bo‘lardi ham, ammo “Chelsi” har doimgidek kutishni istamadi. Haverts ham, Verner ham hali yosh, ularga vaqt kerak. “Siz bizning yosh futbolchilardan mutlaqo barqaror bo‘lishni talab qila olmaysiz. Ular hali shu darajagacha o‘sadi, ammo hozircha ishlash kerak”, – degandi Frenk jamoani himoya qilgan holda.

Lemparddan ikkinchi marta qadrdon klubidan ketish so‘raldi, ammo bu uni sindira olmaydi. Frenk yoshlar bilan ishlay olishini va har qanday darajadagi klubni boshqarishga qodirligini namoyish etib ulgurdi. Bir kun kelib u tom ma’nodagi murabbiylik erkinligini qo‘lga kiritadi va aslida nimalarga qodir ekanligini ko‘rsatib beradi. O‘sha paytgacha esa “Chelsi” yana ko‘plab murabbiylarni almashtirgan bo‘ladi – boisi ular boshqacha ishlashni bilmaydi.