16-yanvar kuni Surxondaryo viloyatida joylashgan Tangimush va Oqjar stansiyalari oralig‘idagi temiryo‘l kesishmasida Damas yo‘lovchi poyezdining yon tomoniga urilib, yo‘l-transport hodisasini sodir etdi. Bu haqda IIV Transportda xavfsizlikni ta’minlash bosh boshqarmasi xabar berdi.
Ma’lum qilinishicha, Damas avtomobili svetoforning qizil chirog‘iga qaramay, temiryo‘l kesishmasidan o‘tmoqchi bo‘lib, Toshkent—Termiz yo‘nalishi bo‘ylab harakatlanib kelayotgan yo‘lovchi poyezdining yon tomoniga urilgan.
Yo‘l-transport hodisasi natijasida avtomashina haydovchisi, 1995-yilda tug‘ilgan S.X. olgan jarohatlari tufayli kasalxonaga olib ketilgan. Biroq unga ko‘rsatilgan tibbiy muolajalarga qaramay, haydovchi vafot etgan.
“Poyezd voqea joyida 13 daqiqa turib, so‘ng harakatini davom ettirgan. Poyezd yo‘lovchilari orasida qurbonlar va jarohat olganlar yo‘q”, — deyiladi xabarda.
Avvalroq Yunusobodda temiryo‘l svetoforining taqiqlovchi belgisidan o‘tib ketgan Nexia va Lacetti YTHga uchragani, Farg‘onada shlagbaumni aylanib o‘tmoqchi bo‘lgan yuk mashinasi poyezd bilan to‘qnashgani, Buxoroda 69 yoshli fuqaro yo‘lovchi poyezdi urib ketishi oqibatida halok bo‘lgani hamda Surxondaryoda teplovoz Matiz’ni urib yuborgani haqida xabar berilgandi.
Izoh (0)