Qirg‘izistonning saylangan prezidenti Sadir Japarov o‘zining ilk xorijiy tashrifini Rossiyaga uyushtirishi kutilmoqda. Bu haqda bosh vazir o‘rinbosari Ravshan Sobirov mamlakat parlamentidagi nutqida ma’lum qildi, deb yozmoqda “RBK”.
“Yangi prezidentning birinchi tashrifi Rossiyaga rejalashtirilgan”, — deyiladi xabarda, biroq Sobirov tashrif sanasini aytmagan.
Qirg‘izistonda 10-yanvar kuni muddatidan oldin prezident saylovlari bo‘lib o‘tdi. Bunga aholining bir qismi parlament saylovlari natijalarini tan olmasdan mamlakatda o‘tkazgan norozilik namoyishlari oqibatida avvalgi davlat rahbari So‘ronboy Jeenbekovning oktabr oyida iste’foga chiqishi sabab bo‘lgan.
Ovoz byulletenlari 100 foiz hisoblab chiqilgandan so‘ng Markaziy saylov komissiyasi sobiq bosh vaziri vazifasini bajaruvchi Sadir Japarovning g‘alabasi e’lon qilindi. Saylovda to‘plangan 79,23 foiz ovozning 39,75 foizi Japarovga berilgan. Mazkur ko‘rsatkich 3,5 million saylovchining 1,1 million nafarini tashkil etgan.
Ovozlarni sanash paytida Japarov saylovlarni boshqarayotgani ma’lum bo‘lgach, uning bir qancha raqiblari dastlabki natijalarni tan olmasligini e’lon qildi. Xususan, “Butun Qirg'iziston” partiyasi rahbari Adaxon Madumarov elektron saylov qutilarini soxtalashtirish haqida gapirgan. Milliy xavfsizlik qo‘mitasining sobiq rahbari Abdil Segizbayev saylov natijalariga qarshi chiqish niyatidaligini aytgan.
21-yanvar kuni Qirg‘iziston hukumati iste’foga chiqdi. Japarovning inauguratsiyasi 28-yanvarga belgilangan.
Avvalroq Shavkat Mirziyoyev Sadir Japarovni Qirg‘izistondagi prezidentlik saylovlarida qozongan g‘alabasi bilan tabriklagani, Sadir Japarov Rossiyani Qirg‘izistonning bosh ittifoqdoshi deb atagani hamda Japarov Qirg‘izistonda rus tilining rasmiy maqomini saqlab qolishga va’da bergani haqida xabar berilgandi.
Izoh (0)