Nyu-Yorkdagi pentxaus uylarda istiqomat qiluvchi insonlar 20 yil davomida uylarni tozalagan, biroq pandemiya sababli ishidan ayrilgan Roza ismli farroshga minnatdorchilik bildirishga qaror qildi. Ular ayolga ikki yillik ijara haqi to‘langan pentxauslardan birining kalitini topshirgan. Kutilmagan sovg‘adan hayratga tushgan ayolning videosi Reddit tarmog‘iga joylangan.
Rolik mualliflarining ta’kidlashicha, Roza singlisi bilan bitta kvartirada yashab kelgan. Ayolni mijozlardan biriga namoyish etish oldidan pentxausni tozalashga chaqirishgan va u o‘zi bilan chelak hamda artishda kerak bo‘ladigan boshqa anjomlarni ko‘tarib kelgan. Ikki nafar yigit unga kvartira bo‘ylab ekskursiya uyushtirgan, Roza to‘rtta yotoqxona, bir nechta vannaxona va tomdan shaharni tomosha qilish mumkin bo‘lgan balkondan hayratga tushganini yashirib o‘tirmagan.
Shundan so‘ng, ular xonalarning birida to‘xtagan va rieltor shartnomaga imzo chekishni so‘ragan. “Muxlislaringiz birlashib, barachasini hal etdi. Sizdan talab qilinadigan yagona narsa — kalitni olish va qog‘ozlarga imzo chekish. Endi ushbu kvartira ikki yilga sizning ixtiyoringizda”, — deydi rieltor. Shokka tushgan ayol rieltorning so‘zlariga ishona olmay, yig‘lab yuborgan.
Voqea Reddit tarmog‘ida mashhurlikka erishib, 100 mingdan ortiq layk to‘plagan. Video ostiga qoldirilgan izohlarda foydalanuvchilarning aksariyati insonlarning bu kabi xatti-harakatiga minnatdorchilik bildirgan bo‘lsa, ayrimlarga esa voqea ko‘ngilni xijil qiladigandek tuyulgan. Sayt foydalanuvchilarining ta’kidlashicha, ular oddiy insonlar butun umr mehnat qilsa ham, shunga yarasha yashay olmasligidan xafa bo‘lgan.
Avvalroq Los-Anjelesda dizayner boshpanasiz ayolga yangi kvartira sovg‘a qilib, TikTok’ni hayratlantirgani to‘g‘risida xabar berilgandi.
Izoh (0)