Eduard Manening oldin namoyish etilmagan kartinasi Parijdagi auksionga qo‘yiladi. Rassom 20 daqiqa chizgan surat 280 ming yevroga baholanmoqda

Fransiyalik rassom Eduard Manening ilgari ko‘rgazmalarda namoyish etilmagan it tasvirlangan kartinasi 26-fevral kuni Parijdagi auksionga qo‘yiladi, deb yozadi The Guardian.

Ma’lumotlarga ko‘ra, Mane 1879-yilda ushbu kartinani tez-tez tashrif buyurib turadigan restoranining egasining qizi — Margarita Gotye-Latyuiyga sovg‘a qilgan. Kartina 32,5 x 24,5 santimetrli polotnoga chizilgan.

San’atshunos Frederik Shanuaning ta’kidlashicha, Minne laqabli it tasvirlangan kartina 20 daqiqa davomida chizilgan.

So‘ng 140 yil davomida kartina Latyuiylar oilasining shaxsiy mulki bo‘lib kelgan, uni sotish borasidagi takliflarni rad etib kelgan.

26-fevral kuni auksionga qo‘yiladigan kartina kamida 280 ming yevroga sotilishi rejalashtirilmoqda.