Xonanda Shahzodaning kinodagi eng yorqin obrazlari (video)

Estrada xonandasi Shahzoda – Zilola Musayeva bir necha yillardan buyon o‘z qo‘shiqlari bilan muxlislar ko‘nglini shod etish bilan birga, rang-barang rollari bilan aktrisalik mahoratini ham namoyon qilib kelmoqda. Quyida uning filmdagi eng esda qolarli obrazlari sanab o‘tiladi.

“Sevinch” – Nargiz

Film xonanda Lola Yo‘ldosheva ijro etgan obraz – saraton kasalligiga chalingan Sevinch ismli qizning hayoti haqida hikoya qiladi. Ushbu kartinada Shahzoda uning eng yaqin dugonasi, Doniyorni sevib qolgan boy qiz – Nargizni ijro etgan. Shu vaqtgacha Shahzoda xonanda sifatida tanilgan bo‘lsa, ushbu filmdan keyin muxlislar uni aktrisa sifatida ham tan oldi.

“Fotima va Zuhra” – Zuhra

Ushbu kartinada xonanda egizaklarning biri – Zuhra obrazida namoyon bo‘lgan. Yosh bo‘lishiga qaramay, oilasida yuz bergan fojialar tufayli opasi Fotima o‘z joniga qasd qiladi. Otasi hamda akasidan ayrilgan Zuhra haqiqat uchun kurashadi. O‘zbek filmlari orasida klassikaga aylangan mazkur kartinani hanuzgacha odamlar zavq bilan tomosha qilmoqda.

“Zumrad va Qimmat” – Zumrad

Shahzoda ijro etgan obrazlarning aksariyati katta qiyinchilikka duch keladi. “Zumrad va Qimmat” filmida ham shunday, ikki qizi bor o‘gay ona, beva qolgan ota va xizmatkor Zumrad. Filmda qahramon o‘z baxti uchun o‘zi kurashishi kerak bo‘ladi va bu yo‘lda bir qancha to‘siqlarni yengib o‘tadi.

“Majruh” – Sevara

Og‘ir kasallik tufayli sevgilisi tashlab ketgan Sevara o‘z joniga qasd qiladi. Ammo doimiy voqealarga ko‘ra, oxirgi daqiqalarda uni Farruh – Ulug‘bek Qodirov qutqaradi. O‘zi nohaq ayblov tufayli qamalib chiqqan bo‘lsa-da, qizni baxtli qilish uchun soxta to‘y qilishga qaror qiladi. Ammo juftlik oldinda ajoyib voqealar kutib turganidan bexabar edi.

“O Maryam, Maryam” – Maryam

Mazkur kartinada Shahzoda ijro etgan Maryam ismli qizning taqdiridan hikoya qiladi. Voqea qamoqxonadan boshlanadi. Maryam voqealar davomida psixologga qanday qilib bu nuqtaga kelganini aytib beradi. Bolaligidan otasiz ulg‘ayishi, onasidan ayrilishi, erta turmush, farzandsizlik va nihoyat turmush o‘rtog‘ining qotiliga aylanish kabi voqealar Maryam obrazi atrofida aylanadi.