22-yanvar kuni Transport vazirligida Eronning Zagros Airlines aviakompaniyasi vakillari bilan uchrashuv bo‘lib o‘tdi, deb xabar beradi vazirlik matbuot xizmati.
Ma’lum qilinishicha, transport vaziri o‘rinbosari Jasurbek Choriyev va Zagros Airlines aviakompaniyasining O‘zbekistondagi bosh vakili Morteza Sheyxassani o‘zaro muloqotda ikki davlat o‘rtasida muntazam havo qatnovlarini qayta tiklash masalasini muhokama qilgan.
Shuningdek, aviakompaniya vakillari yo‘nalishlar geografiyasini kengaytirish, tranzit salohiyatini rivojlantirish va parvozlar sonini oshirish bo‘yicha qator takliflarni bildirgan.
“Zagros Airlines aviakompaniyasi Eronning turli shaharlaridan Samarqand va Buxoroga aviareyslar qo‘yish istagida ekanligini ma’lum qildi”, — deya ta’kidlanadi xabarda.
Avvalroq, 2020-yilning noyabrida Eronning O‘zbekistondagi yangi elchisi ikki mamlakat fuqarolari uchun vizalarni bekor qilishni taklif qilgandi.
Eslatib o‘tamiz, Eronning Zagros Airlines aviakompaniyasi tomonidan Tehron—Toshkent—Tehron yo‘nalishidagi ilk muntazam aviareys 2019-yilning dekabrida amalga oshirilgan edi. O‘shanda Eron aviakompaniyasi dastlabki bosqichda mazkur yo‘nalishdagi parvozlarni haftasiga bir marta bajarishi, keyinchalik parvozlar muntazamligi haftasiga ikki martaga yetkazilishi rejalashtirilgan edi.
Izoh (0)