Xitoy Tramp ma’muriyati vakillariga qarshi sanksiyalar e’lon qildi. Oq uy ularni “samarasiz” deb atadi

Xitoy hukumati AQShning 45-prezidenti Donald Tramp ma’muriyati vakillariga qarshi sanksiyalar joriy qildi. Bu haqda 20-yanvar, chorshanba kuni Xitoy Tashqi ishlar vazirligi matbuot xizmati xabar berdi, deb yozmoqda “Korrespondent.net”.

Jo Bayden prezidentlik lavozimida ish boshlashi bilanoq Xitoy hukumati Tramp ma’muriyati vakillariga sanksiyalar joriy qildi. Ta’kidlanishicha, AQSh davlat kotibi Maykl Pompeo ham sanksiyalar ostida qoldi. Bayonotda aytilishicha, ro‘yxatga kiritilgan siyosatchilar Xitoy xalqini haqorat qilgan va Xitoy—AQSh munosabatlariga jiddiy putur yetkazgan.

“Xitoy hukumati mamlakat suverenitetini jiddiy ravishda buzgan va Xitoy bilan bog‘liq masalalarda AQShning bu tarzdagi harakatlari uchun asosiy javobgar hisoblangan 28 kishiga qarshi sanksiyalar qo‘llash to‘g‘risida qaror qabul qildi”, — deyiladi bayonotda.

Sanksiyalar ro‘yxatiga, jumladan, quyidagi rasmiylar kiritildi: Tramp ma’muriyatidan Maykl Pompeo, Piter Navarro, Robert O’Brayen, Devid Stiluell, Mettyu Pottinger, Aleks Azar va Kelli Kraft, shuningdek, Jon Bolton va Stiven Bennon.

“Ushbu shaxslar va ularning yaqin oila a’zolariga mintaqaga, Xitoyning Gonkong va Makao ma’muriy tumanlariga kirish taqiqlanadi. Ular va ularga bog‘liq kompaniya va muassasalarga Xitoy bilan ish olib borish man etiladi”, — deyiladi bayonotda.

Oq uy Xitoyning ushbu harakatini “surbetlik”, sanksiyalarni esa “samarasiz” deb atadi hamda ikkala partiyani ham cheklovlarni qoralashga chaqirdi.

Avvalroq AQSh dunyoda birinchi bo‘lib Xitoyni uyg‘urlarga nisbatan genotsidda ayblagandi.

Eslatib o‘tamiz, 2020 yil 7-avgustda Qo‘shma Shtatlar Gonkongdagi 14 nafar Xitoy amaldori va ularning ittifoqchilariga, xususan, Gonkong ma’muriyati rahbari Kerri Lamga qarshi Britaniyaning sobiq mustamlakasida siyosiy erkinliklarni cheklashdagi roli uchun sanksiyalar qo‘llanilishini e’lon qildi.

Undan avval AQSh Xitoyning Shinjon-Uyg‘ur avtonom hududida inson huquqlari me’yorlarining buzilishi sabab mazkur viloyatdagi amaldorlarga nisbatan sanksiyalar qo‘llagan hamda uyg‘urlarga qilinayotgan zug‘umlar sabab ushbu viloyatdan paxta importini cheklab qo‘ygan.