“EpiVakKorona” koronavirus vaksinasining immunologik samaradorligi 100 foizni tashkil qiladi. Bu haqda “Rospotrebnadzor”ga tayanib, “Interfaks” xabar qildi.
Vaksinaning samaradorligi uning immunologik va profilaktika samaradorligidan iborat. Klinik sinovlarning birinchi va ikkinchi bosqichlari natijalariga ko‘ra “EpiVakKorona” vaksinasining immunologik samaradorligi 100 foizni tashkil qildi.
Ta’kidlanishicha, “EpiVakKorona” vaksinasini klinik sinovlarining birinchi va ikkinchi bosqichlari iyul–sentabr oylarida o‘tkazilgan. Ikkinchi bosqichda 86 kishi ishtirok etgan. Ulardan 43 nafari vaksinani, yana 43 nafari platseboni olgan. Vaksinani qabul qilgan barcha ko‘ngillilar o‘zlarini yaxshi his qilgan, faqat ikki nafar ishtirokchida inyeksiya joyida ikki kun davomida og‘riq paydo bo‘lgan.
Noyabr oyida 60 yoshdan oshgan 150 ko‘ngilli va 18 yoshdan oshgan 3000 ko‘ngilli ishtirokida marketingdan keyingi emlashni o‘rganish bosqichi boshlangan. “Rospotrebnadzor”ning qayd etishicha, vaksina qabul qilgan odamlarda nojo‘ya reaksiyalar kuzatilmagan.
Sinovlarning natijalari yanvar oyining oxiriga qadar e’lon qilinishi kerak. Hozirga qadar ilmiy adabiyotlarda bironta “EpiVakKorona” tadqiqotlari natijasi nashr etilmagan.
Ma’lumot uchun, “EpiVakKorona” koronavirusga qarshi Rossiyaning ikkinchi vaksinasi. U oktabr oyida Rossiyada ro‘yxatdan o‘tgan.
Birinchi vaksina avgust oyida ro‘yxatdan o‘tgan Moskvadagi Gamaleya markazidan “Sputnik V” vaksinasi edi. Uning umumiy samaradorligi 91,4 foizga baholangan.
Ayni paytda “EpiVakKorona” vaksinasi fuqarolar uchun kam miqdorda chiqarildi. Uning keng ko‘lamli ishlab chiqarilishi fevral oyida boshlanishi mumkin.
Izoh (0)