Samarqand viloyati Bulung‘ur tumanidagi 13-maktabgacha ta’lim muassasida mudira bog‘cha tarbiyalanuvchisini urgani va holat yuzasidan Bulung‘ur tuman prokuraturasi tomonidan tergovga qadar tekshiruv harakatlari olib borilayotganligi to‘g‘risida xabar berilgandi. “Sevimli” telekanalining “Zamon” informatsion dasturi mazkur holat yuzasidan o‘rganish o‘tkazib, kaltaklangan bola bilan suhbatlashdi.
Bolaning yuziga shapaloq tortgan bog‘cha mudirasi Rohatoy Ahrorova ushbu holat qasddan uyushtirilganini ta’kidlagan. “Psixolog olgan buni. Qasddan qilingan, uyushtirilgan bu”, — deydi mudira.
Qayd etilishicha, 6 yoshli bola zukkoligi uchun maktabgacha ta’lim tashkiloti tomonidan taqdirlanib kelgan.
“Eng yaxshi bog‘cha opalarim — Shahnoza, Dilya opa. Yomoni esa Rohat opa (mudira — tahririyat). U o‘zi hamma bolalarni uradi”, — deydi tarbiyalanuvchi.
Shuningdek, bolaning bobosi ham holatga munosabat bildirgan.
“Men bu kishini kechirmayman. Avval ham bu ishlar bo‘lgan ekan. Biz buni bilmaganmiz. Ertalab, bolam, bog‘chaga borasanmi desak, bormayman dedi. Kecha videosini ko‘rib, asablarim buzilib ketdi”, — deydi Murod Mamatqulov.
“She’rlarni yaxshi yodlaydi. Mashg‘ulotlarga ham qatnashadi, lekin biroz to‘polonchiligi bor”, — deya qayd etgan tarbiyachi Dilfuza Mahkamova.
Ma’lum bo‘lishicha, avval ham mudiraning ustidan mutasaddi tashkilotlarga shikoyat kelib tushgan. Ammo mudira shikoyat qiluvchilarni turli yo‘llar bilan yengib kelgan. Hozirda tegishli tashkilotlar tomonidan holat yuzasidan o‘rganish ishlari o‘tkazilmoqda va tez orada mudiraga tegishli chora ko‘rilishi ma’lum qilingan.
Avvalroq Mirishkor tumanida chilim chekkan bog‘cha opalar videosi tarqalgani va ular ishdan olingani, Farg‘onada 2 tup chinor va bir tup tolni noqonuniy kestirgan bog‘cha mudirasiga 15 million so‘m jarima yozilgani hamda Maktabgacha ta’lim vazirligi Andijonda ishini yo‘qotgan bog‘cha mudirasi o‘zini osib qo‘ygani yuzasidan rasmiy izoh bergani haqida xabar berilgandi.
Izoh (0)