“Elchinining qizi” nomli turk serialida bosh qahramon rolini ijro qilayotgan aktrisa Neslihan Atagul, sog‘ligi yomonlashgani sabab suratga olish maydonchasini tark etishini ma’lum qildi. Bu haqda “Kinoteka” xabar berdi.

Foto: Instagram / Sefirinkizidizi

Ma’lum qilinishicha, uning salomatligidagi muammo ichaklar faoliyatining o‘tkazuvchanligi buzilgani, mikrob va bakteriyalarning to‘g‘ridan to‘g‘ri qonga o‘tishi bilan bog‘liq.

Foto: “Kinoteka”

Uzoq vaqtdan buyon o‘zini yomon his qilayotgan, og‘riq qoldiruvchi dori vositalari bilan faoliyati davom etayotgan aktrisa, ahvoli yomonlashgani sabab zudlik bilan suratga olish ishlari bo‘lib o‘tayotgan Mugladan Istanbulga qaytib kelgan. Ko‘rikdan o‘tgan Neslihanga shifokor shifoxonaga yotishi kerakligini aytgan va shundan keyin u prodyuserlar bilan kelishib 10 kunlik ta’til olgan.

Foto: Instagram / Sefirinkizidizi

Foto: Instagram / Sefirinkizidizi

Bosh qahramonning yo‘qligi sabab serialning senariysiga o‘zgartirish kiritilgan. Ammo keyinroq shifokorlar 26 kun shifoxonada davolanishi kerakligini ma’lum qilgan. Shundan so‘ng Atagul, yaqin bir necha oy davomida ishlay olishiga ko‘zi yetmay, serialni tark etishga qaror qilgan va bu haqda Instagram sahifasida e’lon qilgan.

Foto: Turk Cinema

Aktrisa ijro davomida butun vujudi bilan rolga kirishgan qahramoni Nare bilan xayrlashayotganini, biroz vaqt dam olishi kerakligini aytib, “Elchining qizi” jamoasiga va muxlislariga minnatdorchilik bildirgan. “Yaxshiki, sizlar borsiz, tez orada boshqa hikoyalarda ko‘rishguncha”, — deb qo‘shimcha qilgan.

Foto: Instagram / Sefirinkizidizi

Prodyuserlik kompaniyasi ham Neslihanning ketayotgani haqidagi ma’lumotni tasdiqlab, uning tezroq tuzalib ketishiga tilakdosh ekanini, shuningdek, yangi qismlarda Neslihanning ishtirok etmasligini ma’lum qilgan.

Foto: Instagram / Sefirinkizidizi

Serial muxlislarini sujetning qanday bo‘lishi qiziqtirmoqda. Qanday o‘zgarishlar yuz beradi? Nare o‘ladimi, Neslihan o‘rniga boshqa bir aktrisa keladimi yoki Sanjar boshqa bir insonni sevib qoladimi? Ushbu savollar javobini serialning keyingi qismlarini tomosha qilish orqali bilish mumkin.

Avvalroq serialda Sahra va Menekshe obrazlarini yaratgan aktrisalar ham loyihani tark etgan edi.