Rafiqasi bilan ajrashgan erkak hech qanday parhezsiz 111 kilogramm vazn tashladi

Reddit saytining foydalanuvchisi katta o‘zgarishlarga boy bo‘lgan surati bilan bo‘lishdi. U 111 kilogramm vazn tashlab, tanib bo‘lmas darajada o‘zgargan, deb yozadi “Korrespondent.net”.

“Late-Community-5856” nomli sayt foydalanuvchisi turmush o‘rtog‘i bilan ajrashganidan keyin bir yarim yil ichida parhezsiz vazn yo‘qotganini ma’lum qilgan. Uning posti joylashtirilganiga bir sutka ham bo‘lmay, 141 ming ovoz va 3 mingta izoh to‘plagan.

Muhokama chog‘ida erkak vazn yo‘qotishining asosiy sababi – rafiqasi bilan ajrashganidan keyingi tushkunlik ekanini tan olgan. “Men shunchaki ko‘p ovqatlanishni to‘xtatdim”, − deydi u. Dastlabki 6 oyda 45 kilogramm, keyingi 12 oyda ichida u yana 66 kilogramdan xalos bo‘lgan.

Shuningdek, foydalanuvchi ajrimdan bir yil o‘tgach, o‘zini qo‘lga olgani va hozirda baxtli ekanini ham qo‘shimcha qilgan.