Futbol bo‘yicha Italiya Kubogining 1/8 finalida “Jenoa” 13-yanvar, chorshanba kuni “Yuventus” maydoniga safar qildi.

Foto: Twitter

Uchrashuvning dastlabki daqiqalarida turinliklar Deyan Kulusevskining golidan keyin oldinga o‘tib oldi. 23-daqiqada Alvaro Morata mezbonlarning ikkinchi golini urdi. Bunga genuyaliklar birinchi bo‘limda Chiborraning kiritgan to‘pi bilan javob qaytardi.

74-daqiqada mehmonlar hisobni tenglashtirishga erishdi: Filippo Melegoni o‘zining super zarbasi bilan Janluiji Buffonni dog‘da qoldirdi. Asosiy vaqtning qolgan daqiqalarida hisob o‘zgarmadi va qo‘shimcha bo‘limlarga murojaat qilindi.

Qo‘shimcha bo‘limlarning birinchisi yakunlanayotgan bir vaqtda Hamza Rafiya maydon egalarining uchinchi golini urdi. Shu tariqa Andrea Pirlo jamoasi musobaqa chorak finaliga chiqdi.

Mazkur o‘yinda “Jenoa” ikkinchi tarkib bilan harakat qildi, shu sabab ko‘plab yetakchilar qatori Eldor Shomurodov ham maydonga tushmadi.

Yana bir o‘yinda “Napoli” quyi liga vakili “Empoli”ni qiyinchilik bilan mag‘lub etdi va keyingi bosqichga yo‘llanma oldi.

Italiya Kubogi

1/8 final bahslari

13-yanvar, chorshanba

“Yuventus” — “Jenoa” 3:2

Gollar: 1:0 – 2 Kulusevski, 2:0 – 23 Morata, 2:1 – 28 Chiborra, 2:2 – 74 Melegoni, 3:2 – 104 Rafiya.

“Yuventus”: Buffon, Kyellini (Bonuchchi, 65), Dregushin, Demiral (Danilo, 65), Uesli (Ronaldu, 88), Artur, Bentankur (Rabo, 46), Kulusevski, Portanova (Rafiya, 77), Bernardeski, Morata.

“Jenoa”: Paleari, Gilone, Goldaniga, Bani, Chiborra (Ebong, 112), Rovella, Melegoni (Radovanovich, 105), Pyatsa, Lerager, Dumbrevanu (Males, 97), Skamakka.

Ogohlantirishlar: Bentankur (25), Dumbrevanu (29), Gilone (41), Goldaniga (90), Bani (116), Rovella (119), Bernardeski (120).

“Napoli” — “Empoli” 3:2

Gollar: 1:0 – 18 Di Lorenso, 1:1 – 33 Bayrami, 2:1 – 38 Losano, 2:2 – 68 Bayrami, 3:2 – 76 Petanya.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!