AQShda 200 dan ortiq mashinaga ega maslkarlar muzeyi sotuvga qo‘yildi

Amerikaning Florida shtatida 200 dan ortiq ideal holatdagi maslkarlar sotuvga qo‘yildi. Avtomobillar xalq tilida “Maslkarlar shahri” deb ataluvchi ixtisoslashtirilgan muzeyda saqlanmoqda, deb yozadi Motor.

Noyob kolleksiya egasi bo‘lgan Rik Trevorgi o‘zining birinchi maslkarini 14 yoshida sotib olgan. O‘shandan keyin u mashina olib-sotish bilan shug‘ullanishga o‘tgan. Turli mashinalari soni yuzga yaqinlashganida u o‘z orzusini amalga oshirishga qaror qilgan va Muscle Car City avtomobillar muzeyini ochgan.

Ayni vaqtda 1,8 ming kvadrat metr hududda 200 dan ortiq turli maslkarlar saqlanmoqda. Rik Trevogi kolleksiyasining asosini General Motors konserni avtomobillari tashkil etadi, ular orasida turli avlodlarga tegishli 80 ga yaqin Chevrolet Corvette bor, jumladan, 1967-yilda ishlab chiqarilgan 20 ta modeldan tortib, 500 kilometrdan kamroq yo‘l bosgan yangi C8’gacha. Bundan tashqari, bir nechta klassik Chevelle, Camaro, shuningdek, El Camino, 442 va GTO modifikatsiyalarini xarid qilish mumkin bo‘ladi.

Auksion 22—23-yanvar kunlari bo‘lib o‘tadi. Savdolar vaqtida namoyish etilgan barcha maslkarlarni alohida xarid qilish mumkin bo‘ladi. Avtomobillar narxi hozircha oshkor etilmagan, biroq har bir kolleksiyaning noyob ekani inobatga olinadigan bo‘lsa, ular orasida arzonlari bo‘lishi dargumon.