O‘zbekiston elektr stansiyalaridagi texnik muammolar tufayli Afg‘onistonga yetkazib beriladigan elektr quvvati 450 megavattdan 300 megavattgacha tushib ketdi. Shu sababli Kobulning aksariyat qismi elektr energiyasi bilan bog‘liq qiyinchiliklarni boshdan kechirdi, deb xabar qildi TOLOnews’ga tayanib “Gazeta.uz”.
Nashrning yozishicha, so‘nggi bir necha kun ichida Kobulning aksariyat hududlarida yashovchilar elektr energiyasi tanqisligiga duch kelgan. Ushbu kunlar davomida aholiga elektr energiyasi kuniga atigi 20 daqiqa yetkazib berilgan.
TOLOnews’ning Da Afghanistan Breshna Sherkat (DABS) energetika kompaniyasining vakiliga asoslanib xabar qilishicha, ayni vaqtda O‘zbekistondan Afg‘onistonga yetkazib beriladigan elektr quvvati 300 megavattdan 400 megavattga ko‘tarilgan.
DABS o‘z bayonotida energiya quvvati O‘zbekiston elektr stansiyalaridagi texnik nosozliklar tufayli kamayganligini ma’lum qildi. Kompaniyaning ta’kidlashicha, yetkazib berilayotgan elektr energiyasining ko‘payishi elektr ta’minotidagi uzilishlarni kamaytirgan.
Khaama Press nashri Afg‘onistonga O‘zbekistondan yetkazib berilgan elektr quvvati 300 megavattdan past bo‘lganini ta’kidladi. TOLOnews ta’minot uzilishidan avval bu ko‘rsatkich 450 megavatt bo‘lganini qo‘shimcha qildi.
O‘zbekiston Energetika vazirligi “Gazeta.uz”ga hozirda elektr energiyasi shartnomaviy hajmining 85 foizi yetkazib berilayotganini tasdiqladi. O‘zbekiston Milliy elektr tarmoqlari korxonasi afg‘on ommaviy axborot vositalarida tarqatilgan xabarlarga izoh bermadi.
Ma’lumot uchun, Milliy elektr tarmoqlari korxonasi hamda Da Afg‘oniston Breshna Sherkat kompaniyasi o‘rtasida 10 yil muddatga elektr energiyasini yetkazib berish to‘g‘risida bitim imzolangan.
Eslatib o‘tamiz, 5-yanvar kuni O‘zbekistondagi bir qator issiqlik elektr stansiyalarida qisman elektr uzilishlari yuz berdi va bu Qozog‘iston janubida va Qirg‘izistonning ayrim hududlarida elektr energiyasining uzilishiga olib keldi. 7-yanvar kuni esa Energetika vazirligi O‘zbekiston IESlari va mamlakat energetika tizimining ishlash tartibi to‘liq tiklanganini ma’lum qilgandi.
“Review.uz” ma’lumotlariga ko‘ra, Afg‘oniston elektr energiyasining asosiy qismini qo‘shni davlatlardan import qiladi. 2017–2018- yillarda importning umumiy hajmi 4,6 milliard kilovatt soatni tashkil etdi. Unga ko‘ra, O‘zbekiston – 2 milliard kilovatt soat, Tojikiston – 1,2 milliard kilovatt soat, Eron – 724 million kilovatt soat, Turkmaniston – 658,8 million kilovatt soat energiya yetkazib bergan.
Izoh (0)