Namangan viloyati To‘raqo‘rg‘on tumani “Kumidon” mahallasi hududida joylashgan “Afsona-4” avtomobillarga gaz quyish shoxobchasida 11-yanvar kuni soat taxminan 7:50 da gazga navbatda turgan Damas yonib ketdi. Bu haqda IIV Yo‘l harakati xavfsizligi bosh boshqarmasi (YHXBB) xabar bermoqda; hodisa videosi Telegram’da tarqalgan.
Dastlabki ma’lumotlarga ko‘ra, 1999-yilda tug‘ilgan B.A. boshqaruvida bo‘lgan mashinaning yonib ketishiga dvigatel qismidagi elektr simlarining qisqa tutashuvi sabab bo‘lgan. Qayd etishlaricha, yong‘in tezda (boshqa haydovchilar yordami bilan) bartaraf etilgan, hodisa oqibatida tan jarohati olganlar yo‘q.
“Hodisa yuzasidan To‘raqo‘rg‘on tumani IIB YHXB va FVB tomonidan surishtiruv ishlari olib borilib, sodir bo‘lish sabablariga aniqlik kiritilmoqda”, — deya qo‘shimcha qilingan IIV YHXBB axborotida.
Kuni kecha Namangandagi gaz-zapravkalarning birida navbatda turgan haydovchilardan biri vafot etgani haqida xabar berilgan edi. Undan avvalroq esa namanganlik haydovchilar gaz-zapravkada navbat talashib, mushtlashib ketgani ma’lum bo‘lgan edi.
Ma‘lumot uchun, O‘zbekistonda 4-yanvardan beri “magistral gaz quvurlaridagi gaz bosimini qayta tiklash maqsadida” gaz-zapravkalar tong soat 05:00 dan 15:00 gacha, cheklangan tartibda ishlamoqda, buning natijasida gaz quyish shoxobchalarida “4—6 soatlik navbatlar” yuzaga kelmoqda. Ushbu tartib qachongacha davom etishi noma’lum.
Izoh (0)