2020-yil oxirida Amerikaning Ram Trucks kompaniyasi yangi Ram TRX 2021 seriyali pikapini ishlab chiqarishni boshladi. Birinchi partiya hozirda konveyerdan chiqib bo‘lgan. CARakoom’ning yozishicha, pikaplardan biri konveyerdan chiqishga ulgurmay, pachaqlangan.
Ma’lum bo‘lishicha, ko‘ngilsiz hodisa avtomobilni konveyerdan olish vaqtida sodir bo‘lgan. Qandaydir sababga ko‘ra, pikap yon tomonga og‘ib ketib, qulab tushgan. Internetda tarqalgan suratda mashinaga u qadar jiddiy shikast yetmaganini ko‘rish mumkin — faqatgina chap yoni va o‘ng qanoti pachaqlangan.
Biroq ijtimoiy tarmoqlar foydalanuvchilarini kompaniya matbuot xizmati hamon ushbu vaziyatga izoh bermagani sergaklantirgan. Shu sababli shikastlangan avtomobilning taqdiri qanday kechishi noma’lum — utilizatsiyami yoki ta’mirlab sotuvga chiqarish. Ishlab chiqaruvchi ikkinchi variantni tanlash ehtimoli yuqori. Chunki har bir TRX narxi 70 ming dollardan boshlanadi.
Eslatib o‘tamiz, Ram Trucks o‘tgan yilning avgustida taqdim etilgandi. U Ford Raptor’ga raqobatchi hisoblanadi. Mashinaga 702 ot kuchi va 880 Nm aylanuvchi momentni taqdim etishga qodir 6,2 litrli V8 Dodge Hellcat dvigateli o‘rnatilgan. “Yirtqich” soatiga 100 kilometr tezlikka 4,5 soniyada erishishi mumkin. Maksimal tezligi — 190 km/soat.
Izoh (0)