Buxoroda bojalarining vafotiga sababchi bo‘lgan fuqaro 5 yilga qamaldi

Buxoroda o‘zga shaxs nomidagi “Moskvich”ni mast holda boshqarib, uning ariqqa ag‘darilib ketishiga hamda ikki nafar bojasining vafotiga sababchi bo‘lgan fuqaro U.B. 5 yilga ozodlikdan mahrum qilindi. Bu haqda “Daryo”ga Jinoyat ishlari bo‘yicha G‘ijduvon tumani sudi sudyasi Boborahim Ochilov ma’lum qildi.

Aniqlanishicha, 2020-yilning 9-avgust kuni G‘ijduvon tumanidagi “Sohibiyon” mahallasida yashovchi fuqarolar — Umid, G‘ofur, Shavkat hamda Qodir tanishi Alisherning (barcha ism-familiyalar o‘zgartirilgan) xonadonida to‘plangan. Ushbu xonadonda ovqatlanib, spirtli ichimliklar iste’mol qilgan holda tarqalgan.

Oradan bir kun o‘tgach, ya’ni 10-avgust kuni Umid ishonchnoma orqali o‘z boshqaruvida bo‘lgan “Moskvich”da bojasi G‘ofur bilan G‘ijduvon tuman markaziga borib kelgan. G‘ofur tuman markazidan qaytishda bir dona aroq va bir kilo go‘sht olgan. Ular birgalikda bojasi Shavkat xonadoniga borib, kechagi kunning davomi sifatida yozilgan dasturxon atrofida yana to‘plana boshlagan. Besh nafar boja haddan ortiq spirtli ichimlik iste’mol qilgan.

Shundan so‘ng bojalar “Moskvich”da ariqda cho‘milish uchun yo‘lga chiqqan. Yo‘l-yo‘lakay savdo do‘konidan pivo ham xarid qilgan. Ular ariq bo‘yida o‘tirib, pivo ichgan va bir soatga yaqin vaqt mobaynida cho‘milgan. Shundan so‘ng, taxminan, soat 14:30 da bojalar Umid boshqaruvchidagi “Moskvich”da uyiga qaytgan. Mast haydovchi yo‘lda mashina boshqaruvini yo‘qotib, ariqqa ag‘darilgan.

“Avvaliga mashinam qanday ag‘darilganini tushunmay qoldim. Hatto, suv mashinani 10—15 metr nariga oqizib keta boshladi. Men esa nima bo‘layotganini anglolmadim. Suv oqimi mashinamni kanal chetiga surib qo‘ygan ekan. Keyin birdan sergak tortdim, mashina eshigi oynasini urib, sindirib chiqdim. Nafasimni rostlamay, mashina ichidan bojalarimni tortib ola boshladim. Shu orada begona fuqarolar yordamga shoshilishdi”, — deya voqeani eslaydi sudlanuvchi.

Sudda ta’kidlanishicha, sudlanuvchining ikki nafar bojasi voqea joyida vafot etgan.

Sud mast holda mashina boshqargan va ikki nafar fuqaroning o‘limiga sababchi bo‘lgan Umidni Jinoyat kodeksi 266-moddasi 3-qismining “a” bandi (transport vositalari harakati yoki ulardan foydalanish xavfsizligi qoidalarini buzish) bilan aybdor deb topib, 5 yil muddatga ozodlikdan mahrum qilgan.