Xiaomi kompaniyasi Mi 10, Mi 10 Pro, Mi 10 Ultra, Mi 10T va Mi 10T Pro kabi qator modellar o‘rin olgan Mi 10 lineykasini to‘ldirib turuvchi Mi 10i 5G smartfonini taqdim etdi, deb xabar beradi IXBT.

Foto: Xiaomi

Yuqorida nomi keltirilgan smartfonlarning barchasiga Snapdragon 865 protsessori o‘rnatilgan, Xiaomi Mi 10i esa 5G aloqa tarmog‘ini qo‘llab-quvvatlovchi o‘rta darajada bir krisstalli Snapdragon 750G tizimi bilan jihozlangan. Smartfonning boshqa o‘ziga xos jihatlari — 120 gertsli yangilanish chastotasiga ega displey va 108 megapikselli kvadrokamera.

Xiaomi Mi 10i 5G modeliga FHD+ sifatni qo‘llab-quvvatlovchi 6,67 dyuymli IPS ekran o‘rnatilgan. Sensor qatlami so‘rovi chastotasi 240 gertsga teng. Frontal kamera teshigiga ega ekran va qurilmaning orqa paneli Gorilla Glass 5 himoya oynasi bilan qoplangan. Smartfon og‘irligi 215 grammni tashkil etadi, o‘lchamlari — 165,4 x 76,8 x 9 millimetr. Smartfon namlikdan IP53 standarti bo‘yicha himoyalangan.

Foto: Xiaomi

Xiaomi Mi 10i 5G 16 megapikselli selfi-kameraga ega bo‘lgan bo‘lib, u 1080r o‘lchamdagi videolarni soniyasiga 30 kadr orqali, shuningdek, soniyasiga 120 kadr chastotali sekinlashtirilgan rejimda tasvirga olishga qodir. Asosiy kamera — 108 megapikselli Samsung ISOCELL HM2. Uni 8 megapikselli keng burchakli modul hamda makro suratga olish va sahna chuqurligini o‘lchovchi 2 megapikselli ikkita modul to‘ldirib turadi.

Smartfon 8 gigabaytli LPPDR4x tezkor xotira va hajmi 128 gigabaytga yetadigan UFS 2.2 flesh-xotiraga ega. Ikkita SIM-karta va microSD uchun umumiy slot ham mavjud. Xiaomi Mi 10i 5G’ning orqa panelida haroratni o‘lchovchi 11 ta datchik mavjud bo‘lib, u qurilmani sovutish tizimini ishga tushirishga xizmat qiladi.

Smartfon Android 10 va MIUI 12 operatsion tizimlarida ishlaydi, akkumulyator sig‘imi 4820 mA/soatga teng bo‘lib, u 33 vattli tezkor quvvatlanish funksiyasiga ega.

Foto: Xiaomi

Narxlar:

  • 6/64 GB – 287 dollar;
  • 6/128 GB - 300 dollar;
  • 8/128 GB - 328 dollar.

Yangi model savdolari Hindistonda 8-yanvardan boshlanadi.