Farg‘ona viloyatining Yozyovon tumanida 10-sinf o‘quvchisi suvga cho‘kib o‘lgani taxmin qilinmoqda, deya xabar berdi “Daryo” muxbiri.
Ta’kidlanishicha, Yozyovon tumanining “Taraqqiyot” mahallasi Bo‘tqachi qishlog‘ida yashagan 16 yoshli A.A. qishloq hududidan oqib o‘tuvchi Katta Farg‘ona kanaliga o‘zini tashlab, qaytib chiqmagan.
Ayni vaqtda viloyat Favqulodda vaziyatlar boshqarmasining mintaqaviy qutqaruv otryadi tomonidan hodisa sodir bo‘lgan joy va undan besh kilometr uzoqlikdagi masofa oralig‘ida qidiruv ishlari olib borilmoqda. Qariyb o‘n besh kundan buyon yuzlab odamlar ko‘ngilli tarzda marhumning jasadini izlashga kirishgan.
“Daryo” muxbiri bilan suhbatlashgan qishloq ahlining aytishicha, marhumning otasi Abduhoshim Ergashev ikki yildan buyon Rossiyada ishlab kelgan. O‘zbekistonga qaytgan kuni esa ushbu baxtsiz hodisaning ustidan chiqqan.
“O‘sha kuni Rossiyadan keldim, samolyotimiz O‘shga qo‘ndi. Chegaradan O‘zbekistonga o‘tib, mashina gaplashdim. Keyin uydagilarga telefon qilib, shu xabarni eshitdim. O‘zbekistonga qadam qo‘ygan kunim shu holat bo‘libdi. Bu ish hech kimning boshiga tushmasin. Yaratgan katta sinov berdi. Yolg‘iz o‘g‘lim bor edi. Shu bolamning jasadini bir marta bo‘lsa ham bag‘rimga bosib, amallarini bajarib, tuproqqa qo‘yay. Bo‘ldi, shu xolos, boshqa hech narsa kerak emas menga.
Hokim, prokuror, ichki ishlar, hammasi yordam beryapti. ‘MChS’ xodimlari ham shu yerda. Kanalning suvini shunchalik tushirib berishdi, rahmat. Baribir bu suv ko‘p-da. Qish kunlarida qiyin bo‘lyapti. Shu suvni yana ozgina tushirib berishsin”, — deydi Abduhoshim Ergashev.
Yozyovon tuman IBB boshlig‘i Hojiakbar Toshpo‘latovning ma’lum qilishicha, kanalga cho‘kib ketgani taxmin qilinayotgan fuqaroga nisbatan qidiruv e’lon qilingan. Jasadni suvdan qidirib topish choralari ko‘rilmoqda. Hozirda holat yuzasidan surishtiruv ishlari olib borilmoqda.
Izoh (0)