Samarqand viloyatidagi onlayn auksionda savdoga qo‘yilgan qimmatbaho avtoraqam allaqachon Samarqand shahri ko‘chalarida harakatlanayotgan avtomobillardan biriga taqilgani aks etgan surat tarqaldi. Ijtimoiy tarmoqdagi yana bir videoda esa boshqa bir avtomobilda xuddi shu avtoraqam (30 Z 777 ZZ) borligini ko‘rish mumkin. Samarqand viloyati IIB axborot xizmati bu holat yuzasidan munosabat bildirdi.
Ma’lum qilinishicha, hozirda ushbu davlat raqam belgisi — 30 Z 777 ZZ viloyat IIB YHXB ixtiyorida saqlanmoqda.
“Samarqand ko‘chalarida taqib yurilgan Malibu rusumli mashinadagi raqam fotoshop dasturi orqali qo‘yilgan. Ushbu raqam auksion orqali sotib olgan fuqaroga tegishli tartibda rasmiylashtiriladi.
Ijtimoiy tarmoq foydalanuvchilaridan bu kabi haqiqatga yaqin bo‘lmagan xabarlarni tarqatmasliklarini so‘raymiz”, — deyiladi xabarda.
Shuningdek, idora matbuot xizmati keyinroq tarqalgan ikkinchi video yuzasidan izoh bergan.“Ushbu raqam oq rangli Malibu avtomashinasiga qo‘lbola yasab o‘rnatilganligi aks etgan video ham tarqaldi. Hozirda ushbu haydovchini aniqlash choralari ko‘rilmoqda”, — deyiladi xabarda.
Ta’kidlanishicha, ayni daqiqalarda 30 Z 777 ZZ davlat raqami uchun onlayn auksion davom etmoqda va bu raqamning narxi 596 million so‘mga yetgan.
Avvalroq O‘zbekistonda o‘tgan bir yil ichida 262,6 milliard so‘mlik chiroyli avtoraqamlar sotilgani to‘g‘risida xabar berilgandi.
Eslatib o‘tamiz, avtoraqamlarni onlayn-auksionlarda sotilishidan kelib tushgan mablag‘larning 80 foizi davlat budjetiga, 20 foizi Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar maxsus jamg‘armasiga yo‘naltiriladi.
Izoh (0)