O‘zbekiston rasmiy Dushanbening iltimosiga javoban Tojikiston janubida COVID-19 kasallarini qabul qilish markazini qurishga tayyorligini bildirdi, deya xabar qilmoqda Asia-Plus.
Yangi muassasa Xatlonning Kubodiyon tumanida, O‘zbekiston tomonidan bunyod etilayotgan tibbiy markaz negizida quriladi. Shifoxonani jihozlash “O‘zbekneftgaz”ning mablag‘lari hisobidan amalga oshiriladi.
Rasmiy Toshkent qurish va jihozlashni rejalashtirgan COVID-19 bemorlarini qabul qilish va taqsimlash markazining bugungi kunda Tojikistonda muqobili yo‘q.
Bu yerda o‘rnatiladigan uskunalar odamda koronavirus infeksiyasi borligini tezda aniqlashga imkon beradi, so‘ngra aniqlangan COVID-19 kasallarini zudlik bilan viloyat va poytaxt shifoxonalariga malakali yordam olish uchun yuboradi.
Kubodiyonda modernizatsiya qilingan tibbiyot majmuasi qurilishi O‘zbekiston tomonidan 2018-yilning ikkinchi yarmida boshlangan va quruvchilarning rejalariga binoan u 2021-yilning bahoriga qadar bemorlarni qabul qilishga tayyor bo‘ladi.
Markaz qurilishi 2018-yil mart oyida O‘zbekiston Prezidenti Shavkat Mirziyoyevning Dushanbega tashrifi davomida ma’qullangan o‘zbek hukumatining loyihalaridan biridir.
Bundan tashqari, kelishuvlar doirasida, O‘zbekistonni moliyalashtirishi hisobiga, So‘g‘dning Spitamen tumanida 630 o‘quvchiga mo‘ljallangan yangi maktab 2020-yil sentabr oyida foydalanishga topshirildi.
Bunga javoban Tojikiston hukumati Samarqandda 640 o‘quvchiga mo‘ljallangan maktab va Farg‘ona viloyatida bolalar bog‘chasi qurishini ma’lum qildi. Tegishli buyruq Tojikiston prezidenti Imomali Rahmon tomonidan 2018-yil mart oyida imzolangan.
Avvalroq O‘zbekiston ko‘magi bilan Qirg‘izistonda yana ikkita shifoxona qurilgani hamda Hindistonning NephroPlus kompaniyasi O‘zbekistonda to‘rtta dializ klinikasi qurishi haqida xabar berilgandi.
Izoh (0)