Mercedes-Benz Espana zavodining sobiq xodimi ommaviy ishdan bo‘shatishlarga norozilik sifatida nemis markasining 50 dan ortiq avtomobilini yakson qildi. 38 yoshli erkak Cat frontal yuklagichini minib qochib, Vitoriya-Gasteys shahridagi Mercedes-Benz fabrikasiga borgan va darvozani buzib kirib, yangi minivenlarga shikast yetkazgan, deb xabar beradi Motor.
Ispaniyalik jurnalistlarning aniqlashicha, maxsus texnikani bunga qadar Mercedes-Benz zavodida ishlagan, biroq ishlab chiqarishni optimallashtirish doirasida bo‘shatilgan 38 yoshli erkak boshqargan. “Qasoskor” Vitoriya yaqinidagi maxsus texnikani minib qochib, 21 kilometr yo‘lni bosib o‘tgan, harakatlanish vaqtida yo‘l belgilari va avtoturargohdagi avtomobillarga shikast yetkazgan.
Yengil darvoza bilan himoyalangan Mercedes-Benz Espana zavodiga kirish qiyinchilik tug‘dirmagan. Politsiya yetib kelguniga qadar erkak 50 dan ortiq yangi minivenlarni pachoqlashga ulgurgan. Ayrim mashinalarga shu qadar jiddiy shikast yetganidan, ularni qayta ta’mirlab bo‘lmaydi.
Erkak Mercedes-Benz’ning yig‘ish liniyasiga kirishga ulgurmagan — uning asl maqsadi shu yer bo‘lgan. Ta’kidlanishicha, yaqinda zavodda zamonaviy robotlar paydo bo‘lgan bo‘lib, shu sababli rahbariyat ishchilar sonini qisqartirishga qaror qilgan.
Ispaniya huquq-tartibot organi xodimlari “buldozer” haydovchisini qo‘lga olib, unga nisbatan ayblov e’lon qilingan. Ma’lumotlarga ko‘ra, ko‘ngilsiz hodisa oqibatida hech kim jarohatlanmagan. Hozirda yetkazilgan zararning aniq qiymati baholanmoqda.
Izoh (0)