“Elchining qizi” turk serialini ikki aktrisa tark etadi

29-dekabr kuni “Elchining qizi” serialining 34-qismi taqdim etildi. Sujetda kutilmagan o‘zgarishlar yuz bergan.

Deniz Ishin ijro qilgan qahramon Sahra ssenariyga ko‘ra vafot etgan. Denizning o‘zi Instagram sahifasida Sahra bo‘lish uchun borgan joyida ko‘p narsani o‘rgangani, hayotida ko‘plab yaxshi insonlar paydo bo‘lganini ma’lum qilib, jamoaga hammasi uchun minnatdorchilik bildirgan.

Serialda Menekshe rolini ijro qilgan aktrisa Tulin Yazkan ham loyihani tark etgan. Mish-mishlarga qaraganda, aktrisaning serialdan ketishiga bosh rol ijrochisi Engin Akyurek bilan tortishib qolgani sabab bo‘lgan. Avvalroq Engin va Tyulin o‘rtasida munosabatlar bor ekanligi haqida xabar topgan muxlislar uchun ushbu yangilik ham kutilmagan bo‘ldi.

Ma’lum qilinishicha, ssenariy mualliflarining almashgani sabab voqealar rivojida katta o‘zgarishlar bo‘lishi kutilmoqda.  Ssenariy mualliflari Ayshe Ferda Eryilmaz va Nexir Erdem o‘z o‘rnini Eylem Janpo‘lat va Ozan Aksunguruga bo‘shatib bergan. Turkiyaning StarTV kanali orqali ekranga uzatilayotgan, Neslihan Atagul va Engin Aktyurek bosh qahramon rolini ijro qilayotgan mazkur serialning 35-qismini yangi ssenariy mualliflari talqinida ko‘rish mumkin.