Andijon viloyatining Baliqchi tumanida suvga cho‘kib ketgan 18 yoshli nabirasini qutqarish uchun o‘zini kanalga tashlab, halok bo‘lgan 65 yoshli otaxonning jasadi oradan 9 kun o‘tib topildi. Bu haqda “Daryo” muxbiri Umidjon Mamarasulov xabar berdi.

Foto: Andijon viloyat Favqulodda vaziyatlar boshqarmasi

Ma’lum bo‘lishicha, 2020-yil 16-dekabr kuni soat 15:00 da Baliqchi tumanida yashovchi 18 yoshli qiz o‘z joniga qasd qilish uchun o‘zini uyining yonidan o‘tgan Qoradaryo kanaliga tashlagan. Buni ko‘rgan 65 yoshli bobosi esa nabirasini qutqarish uchun o‘zini suvga otgan. Lekin oqim kuchliligi va suvning sovuqligi vaziyatni og‘irlashtirgan va ikkisi ham suvga cho‘kib ketgan.

Foto: Andijon viloyat Favqulodda vaziyatlar boshqarmasi

Viloyat favqulodda vaziyatlar boshqarmasining ma’lumot berishicha, 65 yoshli otaxon va uning 18 yoshli nabirasini qutqarish uchun 26 kishidan iborat guruh tashkil etilib, jasadlarni suvdan chiqarib olish choralari ko‘rilgan.

Foto: Andijon viloyat Favqulodda vaziyatlar boshqarmasi

Qutqaruv ishlari 9 kun davom etgan bo‘lib, bobo va nabirasi cho‘kish holati sodir bo‘lgan joydan, taxminan, 10 kilometr uzoqlikdan topilgan.

Hozirda qizning nima sababdan o‘zini suvga tashlagani o‘rganilmoqda.